fbpx
May 06, 2021

Falta di vision y integridad den maneho di enseñansa superior

Share on facebook
Share on Facebook
Share on whatsapp
Share on Whatsapp
0
0
Falta di vision y integridad den maneho di enseñansa superior
Falta di vision y integridad den maneho di enseñansa superior

“No t’e intencion pa kibra ningun iniciativa di ningun fundacion. Pero como politico, cu berdaderamente ta boga pa mehora calidad di enseñansa y ta para pa integridad, mi tin algun pregunta y esaki relaciona cu nos compas moral y e carta cu ta circulando rond di SVOA fecha 22 di april 2020”, segun SueAnn Ras di MEP.

ALGUN PREGUNTA

Supuestamente kico Minister di Enseñansa a priminti of palabra cu su consehero huridico, kende ta un miembro di directiva di dicho fundacion, cu netamente kier trece un otro academia pedagogico na Aruba? Con integro y moralmente corecto esaki ta? No ta papia aki di un conflicto di interes?

A base di cua investigacion a yega n’e conclusion, pa supuestamente propone otro academia pedagogico riba un isla asina chikito, mientras cu nos sa cu e interes pa inscribi pa bira docente ya caba ta hopi abou?

Ki dialogo tabatin cu IPA mes tocante henter e proceso aki di propone otro academia pedagogico? Dicon Bisdom Willemstad no a implementa esaki na Corsou? Kisas na Corsou si e Gobierno ta respeta y sostene UOC (University of Curacao) LOFO (Lerarenopleiding Funderend Onderwijs)? E iniciativa aki ta un manera indirecto pa IPA ‘bloedt dood’?

IPA ACREDITA PA NVAO

Nos mandatario- y funcionarionan di Gobierno mester tene cuenta cu preparacion y recapacitacion of profesionalisacion di nos maestronan mester tuma lugar na Aruba mes, pa medio di nos propio expertonan y logicamente, pa medio di nos propio instituto pedagogico, IPA.

Instituto Pedagogico Arubano (IPA) ta un instituto acredita pa NVAO (Nederlands-Vlaamse Accreditatie Organisatie) na 2012 pa prome biaha y despues na 2018.

IPA ta un instituto cu trayecto largo y a yuda forma diferente profesional renombra na Aruba, pero tambe den exterior.

IPA SUFICIENTE EXPERTICIO LOCAL

IPA tin hopi experiencia cu preparacion di maestro na nivel di Bachelor pa enseñansa preparatorio, basico y enseñansa secundario. Ademas IPA tin amplio experiencia cu ‘blended learning’, den cooperacion cu University of Curaçao pa diferente estudio y actualmente cu Wayne State College p’e estudio di Education Sciences na nivel di Master.

IPA tin tambe suficiente experticio local necesario di e contexto social-cultural, pa por cumpli cu e puntonan di salida di epistemologia  importante den ciencia di conocemento.

Ta un hecho cu den e ultimo añanan no tin mucho interes bou nos studiantenan p’e profesion di maestro, segun SueAnn Ras. Treciendo un otro instituto na Aruba no lo contribui n’esaki tampoco. Si ta desea di incorpora e programanan (di calidad) den e programa di IPA y si tuma nota cu IPA ta traha cu otro universidad, mester por tin un dialogo pa por coopera cu otro enbes di hinca placa den algo completamente nobo.

Si t’e caso cu e maestronan ta sali for di IPA y supuestamente no tin e preparacion adecua, Gobierno como “bevoegd gezag” mester traha riba e calidad di IPA.

MEP SU PROGRAMA

MEP tin den su programa di gobernacion pa implementa e Quality Assurance Program pa salvaguardia calidad di enseñansa riba varios nivel y lo stimula y promove pa IPA y UA (Universidad di Aruba) sigui of wordo acredita pa NVAO.

Lo sigui stimula y sostene IPA den e acuerdonan interinsular di cooperacion pa mehoracion di enseñansa. Den e proximo gobernacion mester dedica mas atencion na profesionalisacion di nos maestronan, basa riba contexto social-cultural Arubano pa yuda mehora e calidad di enseñansa. Pa por ehecuta e programa di gobernacion nos mester bo sosten dia 25 di juni y asina nos finalmente por traha pa bin cu enseñansa di calidad y igualdad pa tur mucha, hoben y adulto, cu ta locual ami ta para p’e” Sue Ann Ras a duna di conoce.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.