fbpx
June 24, 2021

Censo hunto cu Crisis Team a splica proceso cu por tuma luga pa agilisa eleccion

Share on facebook
Share on Facebook
Share on whatsapp
Share on Whatsapp
0
0
Censo hunto cu Crisis Team a splica proceso cu por tuma luga pa agilisa eleccion
Censo hunto cu Crisis Team a splica proceso cu por tuma luga pa agilisa eleccion

Ayera tardi durante un conferencia di prensa di miembronan di Crisis Team hunto cu director di Registro Civil y Censo, Sharine Luidens, a ofrece detayenan riba eleccion cu lo tuma luga dia 25 di juni. Tambe e restriccionnan pa evita plamamento di virus Covid-19.

Luidens a splica cu e idea cu Censo tin hunto cu profesionalnan cu a studia e materia a trece dilanti un solucion pa agilisa procesonan den eleccion, asina mes el a indica cu ta bon pa tur hende compronde cu eleccion dia 25 di juni ta sosode den cada urna electoral.

Di esaki, el a señala cu den cada urna cu nan presidentenan nan ta responsabel pa e proceso di eleccion e dia ey di e urna, nan tambe ta responsabel pa e conteo di votonan den e urna e dia di eleccion, ademas loke hunta electoral ta haci tambe ta sosteni pa Censo, DOW, otro departamentonan como KPA y DVG den e caso aki pa asina por tin un logistica y un proceso electoral.

Asina mes, Luidens a bisa cu den cada 70 urna cu lo tin e biaha aki, mas dos di Bijzondere Stembureau tin nan propio presidente cu cuatro miembro mas den e urna cu semper tabata te’y di manera boluntario igual cu den otro eleccionnan cu a tuma luga segun loke Luidens a sigura.

Censo, hunta electoral y otro departamentonan tambe ta yuda cu logistica pa asina sostene e 356 miembro di urna pa facilita nan trabou pa motibo cu ta nan ta conta, ta nan ta traha process verbal y a base di e process verbal cu nan ta yena den e anochi ey cu tur loke a pasa hunto cu e turflijst na unda tin tur e candidato, esey ta loke Conseho Electoral ta haya y Censo ta yuda pa yenel’e pa hende por conoce e resultado.

“Esey ta loke ta pasa, ningun momento Censo of Conseho Electoral ta habri e maletanan y nos no ta conta”, Luidens a menciona.

Di loke ta trata e ideanan cu Censo hunto cu profesionalnan a trece dilanti pa lunanan y añanan caba segun loke el a afirma, ta evaluando kico por haci pa motibo cu den ordenansa electoral ta poni cu por usa stemmachine y cu nan no tin papertrail “cu un boton bo ta primi y ora e caba bo ta haya resultado y no tin caminda pa por controla esey”.

Nan a trece un otro manera, cu manera Luidens a declara tambe tin un otro sistema electronico cu por vota, esey ta un stemmachine cu tin un papertrail y cu tin un codigo QR na unda e persona ta cer’e y ta hink’e den e buzon na unda e ta bay scan e codigo QR, e ta haya e resultado y ademas, tin un papertrail tambe, esey tabata un solucion cu lo a sali hopi caro mes, miyon di dollar, segun Luidens a bisa.

Ademas, el a comenta cu e ta kere cu nan tin e deber di sentido civico como servicio publico di trece ideanan pa sostene e miembronan di urna y proteha votadonan y electorado di e sistemanan di sosten di e proceso actual den ley.

E proceso den ley actual na e momentonan aki ta cu e persona ta haya su carchi di votacion na cas, e dia di eleccion e persona ta bay cune na e urna y ta duna esey na e presidente di e urna cu ta lesa un number, e segundo miembro tin un registro na unda e ta bay busca na unda e number di e persona ta, despues e presidente di urna ta duna stembiljet y e persona ta bay den e hoki na unda e ta habri’e, yen’e y ta tir’e den e buzon finalmente.

Loke segun Luidens a expresa ta cu nan a presenta na Crisis Team e mesun proceso aki cu a wordo menciona caba cu te ainda no ta sigur y cu lo ta pa motibo di salud y bienestar general, cu ta lo siguiente, e persona lo haya e mesun carchi di votacion na su cas y riba dje lo tin e codigo QR y cu ora e persona lo yega na e urna dilanti di e presidente e lo scan e codigo QR y bisa e number di e carchi na e checkersnan.

Esaki ta bay haci e proceso mas agil despues cu e proceso di urna ta cera, pa motibo cu ora tur e urnanan lo cera, e presidente ta bay haya cuanto hende a bay vota na e urna ey, “e tablet ey cu scan no ta conecta na absolutamente nada”, el a enfatisa. E ta haci e proceso mas facil pa e presidente y miembronan di e urna ey.

Un bes cu e persona ta haya e stembiljet bashi, e ta bay den su urna y e ta yena di e partido cu e persona ta kere den dje y despues e ta hink’e den e buzon cu ni un hende ta bay wak esey, e buzon ta conecta solamente na un waya di coriente y no ta conecta na un tablet of na diferente compania. E scanner aki ta recolecta y registra na unda e ta bala ta cay, “no tin conexion algun cu e votado, en lo absoluto”, Luidens a specifica.

“Cada partido politico cu nan lista a wordo declara valido, ta haya full e registro di votado cu nomber, adres y tur cos, esey si ta loke nos ta yama un violacion di secresia di hende” el a sigura.

Den su concepto como hurista, Luidens a bisa cu e informacion ey mester wordo elimina di ley pa motibo cu esey ta contra tur regla internacional di privacidad

Tur e proceso aki lo bay tuma for di 8or di mainta te cu 7or di anochi, cu e mashin lo saca un papel na unda lo bisa cuanto voto tin pa cada partido y pa cada candidato, despues di esey ta habri e buzon dilanti tur hende y ta conta cuanto voto tin pa cada un di nan pa wak si tur e candidato ta klop.

“Esaki ta bay minimalisa e oranan y trabou cu tin te oranan di marduga ”, Luidens a afirma.

Si e proceso aki ta bay door, na unda Censo hunto cu Crisis Team ta kere den e idea aki poniendo bienestar y salud di pueblo prome, e miembronan di urna lo wordo alivia y tambe si lo tin menos cu 12 partido, e resultadonan preliminar lo wordo haya e dia ey pa aproximadamente 8r di anochi y e resultadonan oficial ta wordo publica 5 dia despues.

Si no lo utilisa e sistema aki Luidens a afirma cu e resultadonan por bay te den oranan di marduga of mainta di e dia despues.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.