fbpx
June 22, 2021

Estadonan Mericano ta pusha contra uso di tecnologia di reconocemento di cara cerca polis

Share on facebook
Share on Facebook
Share on whatsapp
Share on Whatsapp
0
0
Estadonan Mericano ta pusha contra uso di tecnologia di reconocemento di cara cerca polis
Estadonan Mericano ta pusha contra uso di tecnologia di reconocemento di cara cerca polis

(AP) — Agencianan di cumplimento di ley na Merca a usa tecnologia di reconocemento di cara pa resolve homicidio y atrapa traficadornan di hende, pero e preocupacion tocante su precision y e aumento di vigilancia pervasivo di video ta conduciendo algun legislador estatal pa primi e boton di pausa.

Al menos siete estado y casi dos decena di ciudad a limita uso di e tecnologia cerca gobierno memey di miedo di violacion di derechonan civil, prehuicio racial y invasion di privacidad. Debate tocante prohibicionnan adicional, limite y rekisito di reporta ta na caminda den alrededor di 20 capital estatal den e sesion legislativo actual, segun datonan compila pa Centro di Informacion di Privacidad Electronico.

Legisladornan ta bisa cu nan kier duna nan mes tempo pa evalua con y pakico ta usa e tecnologia. “Mi ta kere cu hende ta djis spanta, y corectamente, pa e tecnologia aki”, segun Freddy Martinez, director di Lucy Parsons Labs, un organisacion sin fin di lucro na Chicago specialisa den derechonan digital di ciudadanonan. “Ta un di e asuntonan inusual cu ta ricibi sosten bipartisando, den e sentido cu niun persona kier wordo vigila unda cu nan bay, specialmente si bo no tin escogencia.”

E asunto a hala atencion den municipalidadnan despues cu agencianan di cumplimento di ley a usa imagennan di tecnologia di reconocemento di cara durante manifestacionnan di husticia racial aña pasa – y den algun caso a usa esakinan pa haci aresto.

Kehonan tocante identificacionnan falso a pone Amazon, Microsoft y IMB pausa benta di nan software na polis, maske mayoria di departamento ta contrata companianan menos conoci cu ta specialisa den contractnan cu polis. Arestonan eroneo di hombernan color scur a hala atencion na Detroit y New Jersey despues cu a culpa e tecnologia pa confundi nan imagen cu esun di otro.

Union di Libertad Civil Mericano a cuminsa expresa pregunta tocante e tecnologia varios aña atras, citando estudionan cu a haya tasanan mas halto di eror pa software di reconocemento di cara usa pa identifica hendenan color scur. Preocupacion tambe a aumenta pa motibo di mayor consciencia di sistema di vigilancia di video extenso di gobierno Chines, specialmente ya cu a usa esaki den un region cu ta cas na un di e poblacionnan minoritario principalmente musulman na China.

Na maart, ACLU a demanda Clearview AI, un compania cu ta provee servicionan di reconocemento di cara na agencianan di cumplimento di ley y companianan priva, contendiendo cu ilegalmente a compila imagen di 3 miyon persona tuma di websitenan riba internet sin nan permiso of conocemento.

Pa varios aña, noticia di e complicacion aki, reporta pa prome biaha pa The New York Times, a genera preocupacion cu e tipo di vigilancia mira na China por sucede na Merca y otro pais. Ciudadnan cu a aproba prohibicion – incluyendo Boston; Minneapolis; San Francisco; Oakland, California; y Portland, Oregon — a lista preocupacion tocante polis usando e tecnologia secretamente entre nan motibonan.

Hoan Ton-That, CEO di Clearview AI, a bisa cu su compania ta colecta solamente potretnan disponibel publicamente riba internet habri cu ta accesibel ‘di cualkier computer na cualkier caminda na mundo’. El a bisa cu no por usa su base di dato pa vigilancia.

Ton-That a bisa cu, como un persona di rasa mixto, ta importante p’e cu e tecnologia no ta prehuicioso. “A diferencia di tecnologianan di reconocemento di cara cu a identifica incorectamente hende color scur, un estudio independiente a indica cu Clearview AI no tin prehuicio racial”, el a bisa den un declaracion. “Nos no sa di ningun suceso den cual tecnologia di Clearview AI a resulta den un aresto eroneo.”

Pero resistencia contra e compania a continua.

Aña pasa, New York a impone un moratorio di dos aña riba uso di e tecnologia na scol, despues cu un districto afluente a adopta reconocemento di cara como parti di su plannan di seguridad y a ricibi demanda. Un ehecutivo estatal di ACLU a yam’e un tecnologia ‘defectuoso y cu perhuicio racial’ cu no ta pertenece den scolnan.

Esey a yega despues di prome prohibicion nacional riba uso di e tecnologia pa gobierno, na San Francisco na 2019, y un moratorio estatal di tres aña riba departamentonan di polis usando reconocemento di cara di videonan di bodycam cu California a impone e mesun aña.

Ningun restriccion asina ta existi na nivel federal. Variantenan di tecnologia di reconocemento di cara a ser usa, incluyendo pa hende ordinario, pa yuda identifica esnan cu a participa den e insureccion letal na US Capitol dia 6 di januari.
Polis tambe a usa e tecnologia aki durante algun protesta aña pasa contra reglanan di coronavirus, y algun activista a us’e pa identifica agentenan di polis den mal comportacion.

Februari ultimo, legisladornan na Virginia a aproba un di e prohibicionnan di mas restrictivo. E ta prohibi agencianan di cumplimento di ley local y departamentonan di polis di campus – maske no polis estatal – di cumpra of usa tecnologia di reconocemento di cara a menos cu ricibi autorisacion explicito di legislatura estatal.

Gruponan di polis ta pushando pa revisa e prohibicionnan.

“Ta uso di miedo den su pio expresion”, segun Jonathan Thompson, CEO y director ehecutivo di Asociacion Nacional di Sheriff. El a bisa cu tecnologia di reconocemento di cara ta apenas un herment usa pa agencianan di polis – y no na e grado cu e politiconan ta sugeri.

Mi nunca a tende di niun persona cu ta sinta rond di un monitor di computer buscando hende henter dia, tur dia. E no ta traha asina”, el a bisa. “Agencianan tin regla. Nan tin maneho di con y ken tin acceso na e basenan di dato. Nan mester tin un motibo legitimo, racional pa hacie.”

Asociacion di Thompson a produci un reporte detayando cantidad di ehempel di e tecnologia siendo usa pa bon, y pa captura traficante di droga, resolve casonan di asesinato y desaparicion, y pa identifica y rescata victimanan di traficacion di hende. Mas frecuentemente, un cara ta compara cu un base di dato di suhetonan conoci. E gran mayoria di imagen ta potret di criminal, el a bisa, no potret di rijbewijs of cualkier potret di individuonan.

Un ley nobo na Massachusetts ta purba di logra un balans entre preocupacionnan civil y di polis. E ta permiti polis pa beneficia di e tecnologia mientras ta agrega proteccion cu por preveni arestonan falso.

Na Ohio, Procurador General Republicano, Dave Yost a dirigi un ley restrictivo riba data di reconocemento di cara – al menos te awo – door di conduci su propio investigacion riba e base di datonan di imagen di e estado como respuesta na un reporte di Centro di Ley di Universidad di Georgetown cu a haya cu oficialnan di inmigracion tabata aplicando e tecnologia riba potretnan di rijbewijs den algun estado.

Investigacion di Yost a haya cu autoridadnan local, estatal y federal no a usa potret di rijbewijs of otro ‘pa ehecuta vigilancia masivo, atake politico of otro uso ilegitimo’.

Martinez di Lucy Parsons Lab a bisa cu e no ta confia.

“Realmente mi ta pensa cu esaki ta un di e hermentnan aki cu ban bisa, ciencia no mester ta usa. E ta unicamente malo den forma cu otro tecnologia no ta”, el a bisa. “Hende na nivel nacional kier pa polis haci nan trabao, pero tin cierto linea cu nos no ta bay laga nan crusa. Esaki ta crusa e linea.”

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.