fbpx
June 22, 2021

Indicacion cu partido MEP ta anticipando perdida di varios asiento den eleccion

Share on facebook
Share on Facebook
Share on whatsapp
Share on Whatsapp
0
-1
Indicacion cu partido MEP ta anticipando perdida di varios asiento den eleccion
Indicacion cu partido MEP ta anticipando perdida di varios asiento den eleccion

Manera ta di spera e ultimo dianan prome cu partidonan politico emiti nan lista di candidato p’e proceso electoral di dia 25 di juni proximo, ta creando basta presion principalmente cerca e dos partidonan grandi, cu ta partido AVP cu tabata esun mas grandi den eleccion di 2017 y partido MEP.

For di inicio di siman y pa algun luna caba, AWEMainta sigur a señala e lucha cu tin den seno di partido MEP, caminda entre otro a señala cu Chris Romero entre otro lo bandona politica y lo mester a bira Director di e departamento nobo di San Nicolas Ports Authority, loke no a tuma luga ya cu Gobierno a cay prome cu realisacion di esaki.

E lucha inicial tabata pa mira kende lo bay tuma over e posicion nr. 3 di Chris Romero riba lista geel, caminda inicialmente a pensa cu e candidato nobo Alvin Molina lo a haya esaki pero a bin cambio drastico den esaki.

Pa algun dia caba tin informacion circulando y aki ta bon pa mustra cu ta informacionnan cu ta bin for di propio seno di MEP, cu ta indica cu Glenbert Croes a wordo promovi pa number tres y lo a baha Chris Romero pa un puesto mas abou y ta algo cu su persona no kier acepta.

Ayera durante henter dia a circula rumor caba di un kiebra entre Romero y partido MEP ya cu e lo a wordo informa cu e lo no ta den e prome seis riba e lista geel, algo cu cu lo ta inaceptabel pa su persona y tambe pa su siguidornan.

Hasta den oranan di merdia a ser mustra cu Romero lo a sera su facebook page y e no tabata acesibel pa duna comentario pa resto di dia, mientras cu e rumornan a sigui nan curso cu indicacion concreto, cu realmente tin un problema cu trahamento di lista di MEP.

E mesun fuente aki a mustra AWEMainta cu no ta solamente cu Chris Romero tin discusion riba posicion den e prome seisnan riba lista, ya cu tin dos te cu tres candidato cu tambe kier ta den e prome seisnan y entre nan nomber di Wilfred Besaril tambe a cay cu e lo baha di number despues di tabata number cinco ultimo eleccion.

E lucha interno aki di partido MEP pa candidatonan keda den e prome seisnan riba e lista, ta duna indicacion fuerte cu e partido ta anticipando cu e lo perde varios di e nuebe asientonan cu el a logra den eleccion di 2017, caminda dos di esakinan tabata e asina yama restzetels.

E motibo pa insisti di ta den e prome seisnan, ta habri lugar cu si e partido no bolbe den Gobierno t’e prome seisnan ta sigur cu nan lo bira miembronan di Parlamento y e otronan lo tin cu regresa bek pa nan trabou original prome cu nan a bira Parlamentario.

E prome cuaternan riba e proximo lista probablemente lo ta Evelyn Wever Croes como lider, sigui pa Xiomara Maduro, Glenbert Croes y Dangui Oduber, mientras cu e lucha cu a surgi ta pa e siguiente dos puestonan cu ta number cinco y seis cu ta confirma e inseguridad di e partido con pueblo lo bay husga e partido despues di un periodo di gobernacion caminda no a duna pueblo net nada.

MEP no a cumpli cu promesanan haci, a suta pueblo cu medida, hunto cu Hulanda a impone asina mas medida serio y ainda tin mas na caminda, mientras cu den e periodo di gobernacion, ningun proyecto na interes di pueblo a wordo realisa.

Pueblo a bira mas pober cu Gobierno di MEP, problemanan social apesar di promesanan haci y miyones poni un banda pa drecha esaki, a sigui aumenta y awor ta mas grandi cu nunca, mientras cu pueblo a tuma nota cu ta famia y amigonan t’e uniconan cu a wordo atendi pa partido MEP.

Share on facebook
Share on Facebook
Share on whatsapp
Share on Whatsapp
0
-1

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.