fbpx
June 22, 2021

Presidente di Conseho Electoral ta compromete cu integridad di eleccion; Dr. Glenn Thode no ta kere cu ley ta stroba introduccion di sosten electronico

Share on facebook
Share on Facebook
Share on whatsapp
Share on Whatsapp
0
0
Presidente di Conseho Electoral ta compromete cu integridad di eleccion; Dr. Glenn Thode no ta kere cu ley ta stroba introduccion di sosten electronico
Presidente di Conseho Electoral ta compromete cu integridad di eleccion; Dr. Glenn Thode no ta kere cu ley ta stroba introduccion di sosten electronico

“Mi ta durf hinca mi man den candela pa integridad di eleccion na Juni.” Asina Presidente di Conseho Electoral, dr. Glenn Thode a bisa Parlamentarionan awe durante un reunion informativo riba e cambionan cu kier trece den e sistema di voto.

Cambionan cu segun Dr. Thode, ta mas bien sosten pa proceso di voto, ya cu riba su mes, e sistema di voto no ta conoce ningun cambio.

Dr. Thode a cuminza pa splica e motibo pakico a dicidi cu mester trece e medionan di sosten den eleccion na Aruba y esey ta netamente pa garantisa integridad. Manera ta conoci, intencion ta pa uza sistema electronico pa verifica cu e persona ta registra riba e asina yama kiezerslijst y tambe pa scan e bala cora di stembiljet na momento cu deposita esaki den e bus. Manera Thode a splica siman pasa caba, e stembiljet mester keda habri pa asina pone esaki cara abou riba e scanner y esaki mes ta chup’e y mand’e den e bus. “E ta tuma un minuut,” dr. Thode a sigura e Parlamentarionan. “No mester tin miedo di uza e sistema aki. Pasobra mi mama por us’e, cualkier hende cu ta uza carchi di banco den un ATM por us’e.” Thode a sigura cu ta bay percura cu tin video pa ilustra con mester deposita e stembiljet riba e scanner, ademas cu ta bay tin uno unda hende por practica riba dje.

Rijbewijs

E problema cu particularmente Parlamentarionan di AVP tabatin cune ta e falta di informacion, mientras cu pa lider di fraccion di POR, Alan Howell, e solo hecho cu tin hopi discusion ta crea desconfianza a pesar cu e sistema proponi por ta uno bon.

E preguntanan tambe tabata dirigi riba e hecho cu e rijbewijs cu a imprimi na Warda di Polis na Santa Cruz ta keda un documento legal pa uzo den trafico pero no ta reconoci como identificacion legal pa dia 25 di Juni. Aki a lanta mas confusion, pasobra Prome Minister Evelyn Wever Croes a bisa cu no por uza e rijbewijs aki, pero Presidente di Conseho Electoral Dr. Thode a papia di un risico. E risico ta cu no tur e rijbewijsnan aki tin tur dato corecto. Y si un persona mester yega na su urna electoral y uza e rijbewijs en cuestion, e ta core risico cu Presidente di e urna ta rechas’e si e datonan no ta cuadra cu locual ta riba e kiezersregister. “Den un caso asina, toch un persona lo meste bolbe cas pa busca otro identificacion.” Dr. Thode no por contesta si ta bay facilita cambio di e rijbewijs bieu (cu ta valido pa trafico) pa uno cu Censo ta imprimi, algo cu e Parlamentarionan a señala cu por yuda hopi hende cu no tin otro forma di identificacion.

Costo

Un pregunta cu a keda sin haya contesta ta cuanto e inversion riba e sistema nobo aki ta. Segun Dr. Thode ta ehecutivonan di Registro Civil y Censo a cuminza e buskeda pa sistemanan electronico y a scoge e sistema di tabulacion di Dominion, a base di nan evaluacion. Y Glenn Thode ta kere den e sistema cu ademas lo haya sosten tecnico di specialistanan di informacion for di Suisa. pero a acerca diferente compania cu ta duna sosten. “A acerca diferente compania, pero algun di nan a hala atras mirando cuanto Aruba tabata dispuesto pa paga,” dr. Thode a bisa. Di otro banda, e tin confianza den e compania cu den su concepto ta colaborando bon y ta coopera cu e parti logistico pa acomoda cu nos ley, di eleccion y asina mira con por cumpli cu specificacion legal. “Mi ta haya e sistema bon y profesional, y ta aplik’e na diferente pais.”

No a tene un destaho publico. Y Dr. Thode mes no a contesta cuanto e sistema digitalisa aki ta costa. Es mas, e ta un hecho cu e gasto di eleccion no ta uno cu ta determina pa Conseho Electoral sino ta un competencia di Prome Minister como Minister di Asuntonan General. Bon Dia Aruba tampoco a haya contesta riba e pregunta cuanto e sistema electronico ta sali Aruba. E unico informacion cu Dr. Thode a duna ta cu e fondonan ta presupuesta y cu nan no ta mucho diferente cu locual otro eleccionnan ta costa.

Pandemia

Aunke cu e idea di introduci e cambionan ta basa riba evaluacion di eleccion 2017 y modernisacion, pa dr. Thode, e pandemia ta hunga un papel mas importante pakico mester introduci sosten electronico pa eleccion. E sistema proponi ta limita cu ta mishi cu mas material y ta duna mas siguridad na e personal di e urnanan electoral. Resultado preliminar lo bira conoci lihe, y e verificacion manual lo por tuma e dianan despues den tur trankilidad pa asina por pone e resultado oficial.

Ta p’esey tambe ta pone un orario riba e carchi di votacion, como sugerencia pa ora di vota. Tur esaki pa evita aglomeracion. “Nos ta den situacion di crisis sin precedencia na Aruba. Ami kier para responsabel pa eleccion unda por garantisa cu e tabata integro, cu tabata imposibel pa sa pa ken a vota, pues cu ta mantene e secresia di voto y pa na final di dia por determina resultado cu menos riesgo posibel, cu hendenan a mishi cu menos obheto posibel. Tur e sugerencianan cu nos a trece dilanti ta pa cumpli cu esaki y cu ningun otro meta.”

Ley

Segun e Presidente di Conseho Electoral, no mester haci cambio na e Kiesverordening pa aplica e sosten electronico. Berdad mester di un asina yama tijdelijke landsverordening pa inclui e aspecto aki. E proposicion pa tijdelijke landsverordening ta na Directie Wetgeving en Juridische Zaken, DWJZ. Parlamentarionan a mustra na dr. Thode cu un landsverordening con cu bay bin ta rekeri aprobacion di Parlamento. Glenn Thode no ta kere cu mester di un Ley di Emergencia pasobra e proposicion di e sistema di sosten electronico ta yuda mitiga risiconan di contagio cu coronavirus.

Bon Dia Aruba a consulta cu un experto imparcial riba Constitucion y e informacion cu a ricibi ta cu un landverordening, sea cu e ta temporario of no, ta rekeri intervencion di Parlamento. Pues den su concepto, sin cu Parlamento aproba, no por introduci e sosten electronico, mirando cu e Kiesverordening ta hopi specifico. E ta nifica tambe cu e Kiesverordening actual ta rekeri pa tur partido entrega na lista personalmente.

Mester bisa cu e reunion a bay segun liña partidista. Fraccion di MEP tabata sostene e cambionan, y aunke otro fraccionnan a bisa di no ta contra un sistema electronico eventualmente, nan ta cuestiona e forma pura cu kier introduci esaki.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.