fbpx
June 22, 2021

Aruba tin mas o menos 10 pa 12 mil persona cu mester yudanza profesional

Share on facebook
Share on Facebook
Share on whatsapp
Share on Whatsapp
0
0
Aruba tin mas o menos 10 pa 12 mil persona cu mester yudanza profesional
Aruba tin mas o menos 10 pa 12 mil persona cu mester yudanza profesional

Comunidad y Prensa di Aruba ta puntra, Director di Respaldo, dr. Hendrikus van Gaalen pa reacciona referente e situacion sumamente lamentabel cu a sosode diamars mainta, unda cu un Arubiano a perde su bida despues cu el a indica cu e no por sigui cu su bida mas dor di e depresion cu e tabata pasando aden.

Na prome lugar nos pensamento ta cune, su famia y amigonan. E ta duro ora un persona ta sufri asina hopi y e ta scoge esaki como su unico salida. Nos ta desea su famia y amigonan tur tipo di sosten posibel y hopi forsa den e tempo dificil aki.

Si nos tira un bista general na Aruba y tambe e sufrimento psikico bou comunidad, lamentabelmente nos tin di bisa cu depresion severo y otro enfermedad mental ta hopi comun. Cifranan internacional y resultado di encuesta haci bou di 75% di Dokternan di Cas ta indica cu mas o menos 10.000-12.000 Arubiano mester di ayudo profesional cu nan salud mental.

N’e momento aki 8.000 di e grupo aki no ta ricbiendo ningun tipo di ayudo pa cu esaki, aunke nan tin derecho pa haya esaki. E crisis di Covid a haci e situacion aki hopi mas pio.

Tin mas depreshon, abuso di alcohol, violencia domestico, trastorno di anciedad, trauma psicologico etc.

E presion riba cuido en general, no solamente cerca Respaldo, pero tambe cerca Dokternan di Cas, SPD y FMAA a crece enorme. Pa Respaldo esaki lamentablemente tambe ta nifica cu pa algun tempo nos no por duna un fecha pa un cita (intake) mas. E tempo di espera p’esaki por dura actualmente den cierto caso un aña.

Desde comienso di e crisis, Respaldo a bati alarma cu mester inverti mas den e cuido di salud mental. Mester hopi mas capacidad di tratamento. Specialmente den tempo dificil p’e economia tin mas presion riba comunidad, mas stress, mas sufrimento, mas anciedad.

Lamentabelmente e inversion aki no a sosode, sufrimento a crece mas y lista di espera tambe, manera nos a indica algun siman pasa den nan rueda di prensa.

Den Reino, Aruba ta hopi atras den cantidad di persona cu por traha p’e cuido di salud mental y tambe den e cantidad cu ta wordo inverti den e cuido aki compara cu Corsou, Islanan BES y Hulanda. AZV no tin e espacio den su presupuesto pa por duna e servicio di cuido necesario aki. P’e motibo aki nos a puntra algun siman pasa Gobierno pa entrega un peticion na Reino pa sosten p’asina nos por yuda e cantidad adicional di personanan cu tin mester di sosten a consecuencia di e crisis di Covid, di mesun manera cu hospitaal a ricibi extra capacidad di cuido intensivo pa yuda pashentenan di Covid. Nos ta spera cu pronto algo lo wordo haci cu nos peticion pa ayudo. 

N’e momento aki tin sigur 7000 Arubiano cu ainda no ta haya e cuido cu nan mester di dje. Nos ta kere cu nos por yuda por lo menos mitar di e grupo aki si nos ricibi algun adicion relativamente simpel, riba locual nos ta haciendo caba. Solamente dor di brinda e cuido necesario pa salud mental n’e comunidad di Aruba tragedianan manera esun di diamars lo por wordo preveni y e chens cu famianan pa resto di nan bida mester sinti falta dor di e perdida di un yiu, ruman, tata, mama of otro ser keri lo ta hopi menos.

7000 Arubiano cu tin derecho riba e cuido di salud mental no ta ricibi esaki. E lista di espera di Respaldo ta largo y ta bay sigur te cu un aña.

UO AZV no a presupuesta e ayudo p’e grupo aki. Respaldo a puntra Minister pa entrega un peticion na Reino pa ayudo. Dor di no corta den e cuido di salud mental nos por evita mas cu ta posibel tragedianan similar n’esun di diamars di sigui sosode, según Respaldo.

Pa mas informacion referente cuido di salud mental na Aruba y Respaldo por acudi na nos pagina di Facebook.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.