fbpx
June 22, 2021

Carlos Guiamo (RAIZ): Determina pa hunto realisa un Democracia Nobo pa Aruba

Share on facebook
Share on Facebook
Share on whatsapp
Share on Whatsapp
+1
0
Carlos Guiamo (RAIZ): Determina pa hunto realisa un Democracia Nobo pa Aruba
Carlos Guiamo (RAIZ): Determina pa hunto realisa un Democracia Nobo pa Aruba

Kisas bo no kier mete cu politica, pero politica ta mete cu’bo tur dia. Cuido medico, enseñansa, proteccion laboral, seguridad, impuesto, incentivanan economico, cuido social, oportunidad igual, tur ta wordo influencia pa decisionnan gubernamental. Pero ta netamente nos sistema gubernamental cu ta fayando nos pa hopi aña caba. 

“Mi nomber ta Carlos Guiamo. Mi ta un tata, partner, yiu y ruman. Mi ta eherece e funcion di hurista legislativo, y mi ta un candidato di plataforma RAIZ. Mi ta determina pa hunto nos yega na un Democracia Nobo pa nos pais. Un democracia cu ta utilisa e talento, conocemento y creatividad di su ciudadanonan. Un democracia husto y responsabel. Un democracia cu ta duna e ciudadano mas influencia. Lagami duna’bo algun ehempel”.

TRANSPARENCIA                

Imagina’bo kico e efecto lo ta, si nos tur por subi un website y sigui e proceso di tur peticion cu a wordo haci pa un permiso, tereno, etc. Naturalmente lo anonimisa informacion personal, pero e proceso mester ta visibel pa nos tur. Asina nos tur lo por wak na cua instancia un peticion ta pega, of wak ora un otro peticion similar misteriosamente ta wordo honra den tempo record.

E nivel di transparencia aki lo aumenta eficiencia y promove un trato igual. 

BO INFLUENCIA COMO CIUDADANO

Imagina e efecto di sa e opinion autentico di pueblo. No e discusionnan toxico riba medionan social, pero e opinion di un grupo grandi y representativo di nos comunidad, cu a haya tur informacion, presentacion y contestanan relevante riba un topico, pa despues delibera y forma un opinion.

Cu un plataforma profesional pa guia esaki, e resultado lo ta un expresion autentico y bon informa di nos comunidad. Considera con esaki por depolitisa decisionnan importante, preveni manipulacion, y revela ideanan y solucionnan nobo. 

REFORMA ELECTORAL Y GUBERNAMENTAL

Si nos sistema Parlamentario lo a wordo inventa awe, e lo a wordo desaproba pa motibo di su falta di checks & balances y conflicto di interes. E ultimo decadanan a duna nos suficiente prueba di esaki.

Ta tempo pa no djies papia di eleccionnan separa pa Parlamento y Gobierno, pero prepara un concepto concreto p’esaki, envolviendo pueblo, y ora e propuesta final ta cla y pueblo ta bon informa di dje, laga pueblo dicidi si nan kier implementa e reforma fundamental aki.

No ban simplemente copy/paste un sistema gubernamental di otro pais, pero ban yega na un sistema cu ta traha pa Aruba. E tempo nos dilanti mi lo elabora riba propuestanan concreto pa yega na un mihor refleho di e deseo di electorado den Gobierno y Parlamento, cambio den e forma di debati den Parlamento, accountability, y mas. No tur solucion duradero ta mesun simpel cu nos lo kier pa e ta. Pero si e ta efectivo y realistico, nos mester ta determina pa logra e cambio y progresa. 

EFECTIVIDAD POLITICO

Ban cambia Aruba su politica den uno cu ta balora efectividad politico mas cu palabra bunita. Carlos Guiamo (RAIZ) ta entusiasma pa scucha, comparti y duna splicacion di ideanan concreto cu lo hiba nos na un Democracia Nobo. Un democracia cu ta produci mihor maneho y mihor decisionnan gubernamental, cu e bienestar di e ciudadano como guia. Facil e no lo ta, pero e beneficionan ta hustifica su determinacion. Formando parti di e plataforma di RAIZ, Carlos Guiamo ta convenci cu 25 di juni 2021 lo bira e inicio di un Democracia Nobo pa Aruba. 

Share on facebook
Share on Facebook
Share on whatsapp
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.