fbpx
June 24, 2021

Partido Accion 21 yamando bon bini na 3 candidato nobo

Share on facebook
Share on Facebook
Share on whatsapp
Share on Whatsapp
0
0
Partido Accion 21 yamando bon bini na 3 candidato nobo
Partido Accion 21 yamando bon bini na 3 candidato nobo

Un bes mas, partido ACCION21 a tene su conferencia di prensa na nan cede di ACCION pa anuncia tres candidato nobo cu a subi lista di ACCION21. Actualmente, e lista di ACCION21 ta consisti di 14 candidato, incluyendo e tres nobonan cu a wordo lansa 5 di mei ultimo.

Lider di partido, sr. Miguel Mansur, a introduci e tres candidatonan nobo: Tony de Jonge,  Raymundo Dijkhoff y Mitchell Ho-Asjoe.

Tony de Jonge a studia pa docente di Historia cu un minoria den Geografia na Ehva Hogeschool na Amsterdam. Na aña 2007, e la haya e oportunidad pa drenta den enseñansa na Aruba y te dia di awe, ainda e ta labora como docente di Historia y Geografia na Juliana School MAVO. Despues di 14 aña den enseñansa, e la haya cu ta tempo pa un cambio y e la dicidi cu esaki ta e momento y e partido corecto pa haci su entrada den politica. “Mi motibonan ta simpel y sincero. Pa prome, mi kier dignidad y respet bek pa nos docentenan. Ta tempo pa nan haya nan bos bek y pa di dos, mi kier pa nos studiantenan ta mas miho posibel prepara pa nan por progresa pa un futuro mas prometedor.”

Raymundo Dijkhoff ta e prome arqueologo Arubano. Despues di a gradua di Colegio Arubano, e la bay Hulanda y a ricibi su drs. den Arqueologia y Historia Cultural di  Indigena Americano. E tin 22 aña eherciendo su trabou na Aruba como hefe di departamento di coleccion y investigacion na Museo Arqueologico Nacional di Aruba. Raymundo semper a y lo para pa e preservacion di nos patrimonio cultural y natural. Raymundo a expresa cu su dos areanan di interes ta Cultura y Deporte. E semper a practica deporte (schaak y baseball) y a representa Aruba internacionalmente. Ademas, pa hopi aña caba Raymundo a desaroya su mes como dirigente y entrenador. “Deporte y cultura ta un instrumento pa forma nos hubentud y yuda hobennan explora nan potencial, bira un bon ciudadano, y cuida nan salud mental y fisico. Mi deseo ta pa mira cultura y deporte haya un posicion real den politica. E posicion cu Deporte y Cultura merece.”

Mitchell Ho-Asjoe a cuminsa gradiciendo e apoyo cu e la haya di tur persona durante ful e trayectoria di e iniciativa “Ta Basta” cu ta lucha contra abuso di mucha. Tambe e la gradici lider di partido Miguel Mansur pa e oportunidad aki pa join ACCION21 y sigui lucha pa e causa. Mitchell a ilustra e consecuencianan masha profundo pa e victima y esnan cerca di dje si nan no wordo trata debidamente. E la papia di su intencion pa yuda implementa un plan pa drecha e comunicacion entre e instancianan social pa asina nan por atende cu e retonan. “Mi ta kere firmemente cu nos por duna nos muchanan un mihor futuro. Nan merece esey di nos. Esaki ta mi compromiso cu Aruba.”

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.