fbpx
June 22, 2021

Presidente Glenn Thode no a convence cu splicacion ayera pa uso di scanner

Share on facebook
Share on Facebook
Share on whatsapp
Share on Whatsapp
0
0
Presidente Glenn Thode no a convence cu splicacion ayera pa uso di scanner
Presidente Glenn Thode no a convence cu splicacion ayera pa uso di scanner

Pa algun ora Parlamento a reuni den un ‘bijeenkomst’ caminda no por a tuma ningun decision oficial, riba uso di scanner den e proximo proceso electoral.

Un reunion cu en realidad no tabatin su balor mirando cu nada lo por a cambia den e reunion aki y solamente Presidente di Conseho Electoral, Glenn Thode, a bin dilanti pa splica di con ta bay haci uso di scanner den eleccion di 25 di juni proximo.

En realidad si por saca un solo conclusion for di loke dra. Glenn Thode a mustra, ta cu e cambio  pa uso di scanner realmente no ta un necesidad, segun su persona tampoco e lo tin influencia riba henter e proceso di eleccion.

Mucho cu loke e Presidente a bisa siman pasa den un conferencia di prensa no a cambia caminda solamente el a haya algun pregunta specifico pa atende haciendo un intento grandi pa splica di con e conseho kier introduci e cambio aki, den un lapso di tempo di algo menos cu tres luna.

Hasta un tiki ridiculo ora cu e duna un splicacion cu si surgi un problema cu machinnan di scan, t’e resultado na man lo t’esun oficial, lentando e pregunta e ora ta con ta sigui pusha pa haci uso di scan sin cu ainda ta totalmente sigur cu e lo funciona sin problema algun.

Ningun momento Presidente Thode a hustifica e insistencia asina grandi pa haci uso di scanner mientras cu tur desaroyo n’e stembureaunan, lo no cambia y lo tin mesun cantidad di hende cu ta sinta semper pa atende e proceso di votacion.

Algo prome cu inicio di e bijeenkomst un grupo di persona hunto cu simpatisantenan di partido AVP cu ta totalmetne contra di uso di scanner dia 25 di juni, a reuni pa vocifera nan desacuerdo cu e intencion di usa e sistema aki, sin cu a prepara votadornan p’e proceso aki.

Den algun declaracion duna pafo na medionan di comuncacion por a tuma nota cu pa hopi hende ainda e proceso aki no ta conoci y ta existi e incertidumbre kico ta pasa cu nan voto ora cu nan bay deposita esaki.

Lider di partido AVP, Mike Eman tambe a bolbe mustra e posicion di su partido riba e asunto aki y a señala cu henter e proceso aki ta habri caminda pa posibilidad di fraude electoral y durante di e splicacion di Presidente Glenn Thode, tampoco esaki a wordo kita of aclaria.

AWEMainta tin cu señala cu simplemente no tin hustificacion algun pa uso di scanner den e proceso electoral y sin duda e ta crea e impresion cu e insistencia pa usa e sistema aki, realmente ta conduci n’e posibilidad pa comete fraude, mas ainda ora cu net un Gobierno cu a dicidi di termina su periodo di gobernacion desastroso cu el a hiba den ultimo tres aña y mey, ta insisti pa uso di e sistema.

Presidente Thode a papia di e proyecto aki ta pa limita contactonan entre personanan n’e urnanan pero en realidad e contacto aki ta inevitabel ya cu ningun momento e por a mustra cu dor di uso di e scanner, lo bay tin menos hende na e sitionan.

E unico diferente cu Thode a papia ‘riba ta cu lo por haya un resultado mas rapido y a purba mustra compasion p’e hendenan cu tin cu keda te lat den oranan di anochi y madruga, pa conta votonan deposita.

Sinembargo aki Glenn Thode a duna e impresion cu e no ta na altura di e mentalidad y hasta cultura di hendenan di Aruba, ya cu hopi di e personanan cu ta keda pa conta voto, semper a considera esaki un honor y un trabou cu nan ta haci cu sumo placer.

E biaha aki tambe nan lo tin cu keda pa conta voto, mescos cu hopi otro a haci esaki pa decadanan anterior y nunca a keha riba e hecho aki y ta hendenan cu prome cu nan sinta conta voto, nan tabata den contacto cu otro caba, mientras cu e peliger di contagio na cual Thode ta mustra riba, no a wordo hustifica.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.