fbpx
June 22, 2021

Unidad control di cacho a tene un accion

Share on facebook
Share on Facebook
Share on whatsapp
Share on Whatsapp
0
-1
Unidad control di cacho a tene un accion
Unidad control di cacho a tene un accion


Dialuna ultimo training di personal di Bureau City Inspector a cuminsa tuma luga, hunto cu personal di otro departamentonan di gobierno cu na dado momento lo por reenforsa e Unidad di Control di Cacho.

E training ta necesario pa e personanan cu ta bay forma parti di e unidad aki por tene cuenta cu e caracter di cada cacho pa evita cu nan ta haya mordi, y tambe pa siña e manera adecua pa gara cacho cual por diferencia pa cada cacho.

Dialuna e team completo a haya un introduccion door di Veterinario Irene Croes, despues un charla cortico di entrenado di cacho Tito Lacle, y desde e momento ey nan entrenado di Cuerpo Policial, Dean Nicholson, a tuma over y a sigui cu nan training di teoria y tambe practica, caminda ta enfoca riba loke por encontra “on field”.

Diaranson e team a sali cu e auto cu a wordo introduci special pa e unidad aki. Bou guia di nan entrenado Nicholson, como parti di training y a base di un notificacion cu a drenta di cual situacion tabata hopi grave, nan a bay na e adres y a topa cu cachonan den estado hopi critico.

Und di e cachonan tabata den hopi mal estado.

Den e caso aki ya caba e doño a firma pa haci distancia di su cachonan y e Unidad di Control di Cacho a hiba 4 cacho na e Centro di Control di Cacho caminda nan a keda den cuido y encargo di profesional den e ramo.

E team a haya oportunidad pa mira di cerca loke ta biba den curason di hopi fundacion cu ta haciendo trabou cu mascotanan neglisha pa hopi aña caba. Ta tristo pa bisa cu debi na e situacion actual di cacho na Aruba, un epidemia si bo kier yam’e asina, tur fundacion ta man yen yudando locual cu nan por yuda cu tratamento veterinario y sterilisacion, en busca pa aloca tur na un hogar nobo. Ohala comunidad di Aruba cuminsa yuda den forma di ta un miho doño pa nan propio mascota, di ta un miho bisiña door di acudi na instancianan cu tin autoridad mas lihe prome cu situacion bira alarmante manera esun di awe, y por ultimo adopta cacho en bes di importa cacho, ya nos fundacionnan por sigui yuda hopi mas cacho den situacion penoso mirando e cantidad di cacho cu tin di wordo rescata y sterilisa.

Comunidad di Aruba por ta orguyoso di nos gobierno cu a opta pa un plan multi disciplinario cu a inicia bou di ministerio di asuntonan general, pero cu realisacion di nos Unidad di Control di Cacho cu a conta cu sosten completo di ministerio di husticia, por bisa cu e fase inicial a wordo completa. Awor mester enfoca riba realisacion di e otro fasenan di e Plan Nacional di Cacho.

 

Share on facebook
Share on Facebook
Share on whatsapp
Share on Whatsapp
0
-1

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.