fbpx
June 22, 2021

Unidad di control di cacho a confisca varios cacho den estado horibel

Share on facebook
Share on Facebook
Share on whatsapp
Share on Whatsapp
0
0
Unidad di control di cacho a confisca varios cacho den estado  horibel
Unidad di control di cacho a confisca varios cacho den estado  horibel
Posted on 05/6/2021 8:56 am AST | Updated on 05/6/2021 8:58 am AST

ORANJESTAD – Dialuna ultimo training di personal di bureau city inspector a cuminsa tuma lugar, huntu cu personal di otro departamentonan di gobierno cu na dado momento lo por reenforsa e Unidad di Control di Cacho. ALERTA: Algun potret por ta hopi cruel pa wak. 

E training ta necesario pa e personanan cu ta bay forma parti di e unidad aki por tene cuenta cu e caracter di cada cacho pa evita cu nan ta haya mordi, y tambe pa siña e manera adecua pa gara cacho cual por diferencia pa cada cacho. 

Dialuna e team completo a haya un introduccion door di veterinario Irene Croes, despues un charla cortico di entrenador di cacho Tito Laclé riba comportacion di cacho y con pa atende cu nan, y desde e momento ey nan entrenador di Cuerpo Policial, Dean Nicholson, a tuma over y a sigui cu nan training di teoria y tambe practica, caminda ta enfoca riba loke por encontra “on field”.

Ayera e team a sali cu e auto cu a wordo introduci special pa e unidad aki. Bou guia di nan entrenador Nicholson, como parti di training y a base di un notificacion cu a drenta di cual situacion tabata hopi grave, nan a bai na e adres y a topa cu cachonan den estado hopi critico. Den e caso aki ya caba e doño a firma pa haci distancia di su cachonan y e Unidad di Control di Cacho a hiba 4 cacho na e Centro di Control di Cacho caminda nan a keda den cuido y encargo di professional den e ramo. 

E team a haya oportunidad pa mira di serca loke ta biba den curason di hopi fundacion cu ta haciendo trabou cu mascotanan neglisha pa hopi aña caba. Ta tristo pa bisa cu debi na e situacion actual di cacho na Aruba, un epidemia si bo kier yame asina, tur fundacion ta man yen yudando locual cu nan por yuda cu tratamento veterinario y sterilisacion, en busca pa aloca tur na un hogar nobo. Ohala comunidad di Aruba cuminsa yuda den forma di ta un miho doño pa nan propio mascota, di ta un miho bisiña door di acudi na instancianan cu tin autoridad mas lihe prome cu situacion bira alarmante manera esun di awe, y por ultimo adopta cacho embes di importa cacho, ya nos fundacionnan por sigi yuda hopi mas cacho den situacion penoso mirando e cantidad di cacho cu tin di wordo rescata y sterilisa.

Comunidad di Aruba por ta orguyoso di nos gobierno cu a opta pa un plan multidisciplinario cu a inicia bou di ministerio di asuntonan general, pero cu realisacion di ee Unidad di Control di Cacho cu a conta cu sosten completo di ministerio di husticia, por bisa cu e fase inicial a wordo completa. Awor mester enfoca riba realisacion di e otro fasenan di e Plan Nacional di Cacho.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.