fbpx
November 30, 2021

Aruba a drenta codigo geel y a cuminsa suavisa medidanan di COVID

Share on facebook
Share on Facebook
Share on whatsapp
Share on Whatsapp
+1
0
Aruba a drenta codigo geel y a cuminsa suavisa medidanan di COVID
Aruba a drenta codigo geel y a cuminsa suavisa medidanan di COVID

Cu menos di 100 caso activo, Crisis Team a conseha Gobierno cu ta momento pa suavisa of flexibilisa e medidanan vigente di COVID-19.

Prome Minister Evelyn Wever Croes a bisa cu a pesar di e decision aki, nan ta haci un apelacion na comunidad henter pa sigui cuida nan mes, y sigui uza tapaboca, mantene distancia y haci man limpi cada rato, y a apela pa esnan cu no a vota ainda pa bay tuma esaki pa logra e vacunacion colectivo.

E situacion di COVID na Aruba ta bayendo den bon caminda, danki na e forma con cada ciudadano ta cuidando nan mes, e mandatario a bisa. “Nos ta mirando e luz na final di caminda, y ta drenta un etapa nobo. Cu e cifranan cu nos tin awor, cu 96 caso activo, casonan activo bahando bou di 100, mirando e situacion na hospital cu 9 persona interna, ta bon indicador. Pero tambe cu tin 56% di poblacion ta vacuna, ta dunando hopi speransa.”

A base di e situacion nobo a hala e orario di Toque de Queda cu un ora mas laat, pues en bes di 11’or, e ta cuminsa pa mey anochi y te cu 4.30 di marduga, pa permiti esnan cu ta haci uzo di gym subi caminda mas tempran. Samenscholing di mas cu 2 hende hunto riba caminda ta wordo elimina. Ta pidi pa sigui uza tapaboca. Gebiedsverbod ta keda existi, no por ta riba luganan publico despues di 7.30 di anochi.

Na restaurantnan e cantidad di personanan na mesa paden ta 8 y pafo ta 10, pero sigui reglanan y no ta permiti bailamento. Encuentronan familiar ta permiti, cu un maximo di 30 persona paden, basta cu tin espacio, y pafo te 60 persona ta permiti. Bishita na cas ta bira posibel, pero ta pidi pa controla cada doño di cas.

Contact sport por tuma luga, pero bou di 18 aña. Ainda conseho di Crisis Team ta cu pa eventonan deportivo paden mester ta sin publico y eventonan pafo 60 hende. Musico ta cinco persona riba scenario y mester percura pa no tin bailamento.

Entiero por tin maximo 60.

Actividadnan publico y politico, ta segun reglanan di Crisis Team. Ta conseha pa mantene distancia.

Si cifranan sigui baha, lo por sigui flexibilisa medidanan, e mandatario a bisa. Pero si cifranan subi, no avansa cu vacunacion y cantidad di hende interna subi, lo mester escala medidanan atrobe.

Share on facebook
Share on Facebook
Share on whatsapp
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.