fbpx
November 30, 2021

HTC no ta sin conocemento, Jessica Wernet a enfatisa: UPP y HTC ta ilustra cu mester uni cu otro pa kibra dominio di partidonan tradicional

Share on facebook
Share on Facebook
Share on whatsapp
Share on Whatsapp
0
0
HTC no ta sin conocemento, Jessica Wernet a enfatisa: UPP y HTC ta ilustra cu mester uni cu otro pa kibra dominio di partidonan tradicional
HTC no ta sin conocemento, Jessica Wernet a enfatisa: UPP y HTC ta ilustra cu mester uni cu otro pa kibra dominio di partidonan tradicional

Jessica Wernet tabatin hopi speranza di cera e lista di HTC dialuna mes. E candidato riba e lista ros tabata para den solo for di 12’or di merdia, dilanti Censo na Playa. E momento cu a combersa cu Wernet, apenas DOW tabata poniendo sobra dilanti Censo, pero e solo no a stroba miembronan di e partidonan cu mester di firma pa por participa den eleccion 2021 pa purba anima hende pa firma nan lista.

Wernet mes tabata spera cu mayoria di e sostenedonan di HTC lo a bin den oranan di atardi pa firma e lista, pa motibo cu nan ta hende cu ta traha. “Nan a bisa di lo pasa despues di 5’or pa firma,” el a bisa Bon Dia Aruba. E momento cu Jessica Wernet tabata combersa cu Bon Dia Aruba, lider di e partido di hoben esta Gilbert Webb tabata sinta den solo, ta come. Ningun di dos tabata preocupa pa e circunstancia pasobra nan meta ta pa haya e sosten necesario pa HTC ta den eleccion 2021. “Nos ta un team y nos ta traha den shift. Di e forma aki mas hende por haya sa ken nos ta, y kico nos ta para p’e, y pa nos convence nan tambe pa deposita nan confianza den nos partido.”

E reaccion te cu awor ta hopi positivo segun Wernet kende pa prome biaha ta riba un lista politico, pero no ta nobo den e mundo di campaña. Wernet kende ta un profesional, un financial comptroller den su bida profesional, ta convenci cu e momento ta awor pa yuda Aruba.

“Hendenan kier cambio, el a bisa Bon Dia Aruba. Ami ta kere cu ta den oranan di atardi, hendenan lo bay na e diferente oficinanan pa firma pa asina e partido cu nan ta kere aden por participa den eleccion.

Yen di partido nobo

No ta un secreto cu pa partidonan grandi y tradicional, presencia di hopi partido nobo (y chikito) ta yuda nan pa haya mas asiento cu locual nan ta gana na voto. P’esey mes, Jessica Wernet ta kere cu hende mester bay vota, mas cu nunca. Si no ta contento cu e partidonan grandi, mester sostene e partidonan nobo.

“Mi ta conseha tur hende pa haci uzo di derecho di voto. Un voto perdi ta uno cu bay pa restzetel, esta e asiento di reserva cu ta bay pa e partidonan grandi. Mi ta conseha tur hende pa pasa firma pa duna e partidonan nobo e oportunidad pa hunto traha y hiba Aruba padilanti. E ta hopi importante. Ami no ta promove voto invalido, pero mi ta pidi tur hende pa vota dia 25 di Juni. Si bo no sa e dia ey ainda pa ken pa vota, haci e voto invalido. Pasobra di otro forma, ta kizas net e partido cu no kier pa gana ta bay probecha di un hende cu a keda sin vota. “Pero, e no ta consehabel pa haci e voto invalido, pues vota pa un partido nobo.”

Wernet a bisa cu historia a mustra cu pa decadanan, e forma di vota pa mesun partidonan no a yuda Aruba. E ta sea of MEP of AVP cu a maneha Aruba den mal forma. Y si keda sin vota, e ta yuda un di e dos partidonan aki.

Pakico HTC

Wernet for di su 16 aña ta sigui politica di cerca. Semper e tabatin su pasion. E tabata admira difunto Betico Croes pa su trabounan. Ademas cu e tabata bon amigo di su tata. “Y for di chikito mi tabata gusta yuda den bario, yuda nos hendenan grandi den bario. Asina ma crece den politica. Mi mes a campaña 12 aña largo pa dos partido. Un di nan grandi. Esey tabata ocho aña pasa.”

Pero e aña aki, Wernet a reta su mes pa drenta politica su mes. E kier sirbi Aruba y e tin e determinacion pa pone e energia aki den ehecucion. Y e motibo pakico el a scoge HTC ta pasobra el a sinti su mes inspira pa e hobennan. “Nan ta un grupo di hoben cu mester di guia.”

Jessica Wernet a fungi como consehero den su bida profesional y kier guia e hobennan di HTC. Su estudio ta den Finance, Economics and Human Resource Management pa cua e tin un Masters Degree. “Mi tin e capacidad pa yuda e hobennan aki pa nan logra nan soño y nan deseo y nan hamber pa yuda Aruba, specialmente hubentud y muchanan.” Wernet a bisa cu e lo trece e conocemento y plannan pa HTC, pero e ta enfatisa cu Gilbert Webb tambe tin su educacion.

“En bes di hende sinta na banda y critica, duna sosten. Mi a sigui e desaroyo di Gilbert for di momento cu HTC a lanta. Y ningun tabatin e curashi y boluntad pa yuda e grupo aki.”

Ademas di yuda e grupo di hoben cu a lanta HTC, Jessica Wernet ta spera cu e partidonan nobo traha cu otro y yuda otro, y cu na Aruba stop di kibra otro. “Na paisnan grandi, bo ta mira con hende ta sostene y yuda otro. Ningun baby ta lanta ta core. Di fout ta siña hopi y esaki ta mi stap den politica activo.”

UPP

Anthony Schouten di partido UPP tambe tabata para dilanti Censo pa motiva ciudadanonan firma pa e lista cu awor ta encabesa pa Seraida Pemberton, un persona hopi conoci pa su trabou como Director di Reclassering. Schouten ta hopi orguyoso di por sostene Pemberton y a bisa cu e partido tin un lider cu tin tur capacidad pa lidera. Y henter e team ta kere cu e tin e habilidad pa hiba Aruba dilanti.

Pero mescos cu HTC, UPP ta kere cu mester uni forsa, pasobra un Aruba unda partidonan ta uni pa bringa pa interes comun ta funciona miho en bes cu ta enfoca riba logro individual.

“Si no uni, cada biaha ta ranca na e mesun cabuya y e no ta bay dilanti. Nos tin un team hopi fuerte y nos tin un lider capaz y hopi humilde cu ta para tras di su palabra. Nos lo no bin cu storia y bin cu plannan cu nos no por ehecuta. Nos ta bin cu un plan prome kico nos tin cu haci, kico por haci y percura cu e ta keda ehecuta. Esey ta locual nos ta para p’e.”

Segun Schouten, realidad ta cu mester keda realistico y honesto cu pueblo pasobra hasta partidonan grandi a priminti un cantidad di cos cu nunca nan por a ehecuta. “Wak con Gobierno mes a cay, pa e motibo aki. Nos no ta bay bringa cu otro, sino wak cua ta e tarea cu mester keda ehecuta y con pa ehecut’e hunto, partidonan nobo y partidonan grandi.”

E mensahe di Anthony Schouten ta cu Aruba mester uni, y stop di punta dede riba otro. Tur e nanishinan mester ta dirigi den e mesun direccion, pa mira kico Pais Aruba mester y asina hunto traha pa interes di tur. “Y no mester pensa aki un aña, ni aki cuater aña. Mester pensa riba mas leu den futuro y wak con mester drecha locual tin awor aki, con pa stimula nos mesun hendenan, sin preocupa pa busca yudansa di afo. Pasobra si cada biaha ta busca ayudo di afo, ta impone riba Aruba y hasta nos mesun leynan. Ban uni na mesa y ban papia.”

E campaña aki ta e prome pa Anthony Schouten, kende a dicidi cu e kier haci un intento pa ta parti di e solucion pa e problemanan di Aruba y e tin confianza den Pemberton di por guia UPP exitosamente.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.