ORANJESTAD – Tin cuater persona na Aruba cu a test positivo cu Covid19, 14 dia despues cu nan a haya nan prome dosis di vacuna Pfizer. Asina e rapport semanal di Rijks Instituut voor Volksgezondheid en Millieu (RIVM) ta bisa e siman aki. E 4 personanan aki a keda contagia cu e variante Britanico. Mesun momento RIVM ta raporta cu e presencia di e variante Britanico a baha te na un 57%, den ‘siman 17. Tur siman RIVM ta saca nan rapport di e islanan di Caribe Hulandes, incluyendo Aruba.
E CONTAGIO
E hecho cu personanan ta contagia cu e virus, aunke cu nan a vacuna, ta possible pa varios motibo. Esaki pasobra ora cu e persona ricibi e prome vacuna, e no ta completamente cubri, ya cu e ta dura algun dia prome cu e efecto di e prome vacuna cuminsa traha. Mes momento, por ta cu e persona tabata contagia caba, sin cu e tabata sa y cu e simptomanan no a bira conoci y e persona a bay vacuna. Ta conoci cu ora cu un persona haya e virus, e tin cu warda un periodo prome cu e por bin na remarke pa haya e prome dosis di e vacuna. Tambe ta conoci cu tin persona cu si nan a haya e virus, nan mester di solamente un dosis di e vacuna. Pues, na tur, no mester alarma pasobra personanan a vacuna, toch ta haya e virus. E punto ta, segun expertonan medico, cu loke ta pasa ora cu bo a ricibi bo vacuna, cu ainda bo por pega cu e virus, pero di un forma mucho mas leve y no peligroso.
