fbpx
June 22, 2021

Encuesta di KVK despues nan debate ta mustra casi 15% ainda indeciso pa vota

Share on facebook
Share on Facebook
Share on whatsapp
Share on Whatsapp
+1
0
Debate di KVK despues nan debate ta mustra casi 15% ainda indeciso pa vota
Debate di KVK despues nan debate ta mustra casi 15% ainda indeciso pa vota
Posted on 06/9/2021 4:49 pm AST | Updated on 06/9/2021 4:52 pm AST

ORANJESTAD – Casi 15% di esnan cu a participa den encuesta di Camara di Comercio basa riba nan ultimo debate politico, no sa ainda pa ken nan vota. Un cifra cu ta keda relativamente halto. For di e Facebook page di Camara di Comercio, noticiacla a compila e informacion riba e tema y a formula e articulo aki. Segun e encuesta cu Camara di Comercio a organisa durante y despues di e prome ( di dos) debate politico recientemente, lider di partido MEP Evelyn Wever Croes a gana esaki (38%), mientras cu esunan cu a sali ultimo, tabata lider di partido HTC esta Gilbert Webb y lider di partido Pueblo Prome Micheal Williams cu cada uno 0.5%. Otronan cu ,segun e encuesta, a haci un bon papel tabata lider di ACCION21 (22%), AVP (13%) y partido MAS(9%). 

MANEHA PAIS

Riba e pregunta di ‘Cua lider politico ta mustra mas adecuado pa dirigi nos pais?’, tambe lider di MEP a gana cu 41%. Notable ta cu e di dos y tres lidernan tabata ACCION21 (16%) y AVP(15%) cu apenas un punto di separacion. Remarcable mirando e experiencia di e lider di partido AVP y e periodo cortico cu sr Mansur ta funcionando como lider di su propio partido. Otronan ta cuestiona si cu porta ta ‘suerte’ cu cierto partidonan a haya cierto pregunta cu tabata bon pa nan mientras cu otro partidonan no tabatin e suerte ey. Asina mes, experiencia mester ta decisivo den un situacion asina. E dos lidernan menos capacita pa lidera nos partido, segun e encuesta, tabata di partido CURPA y Pueblo Prome unda cu ambos a haya 0.5%. 

MENOS PREPARA

E pregunta di cua lider politico tabata menos prepara, a duna como ‘ganador’ den e caso aki, e lider di partido HTC, esta Gilbert Webb, cu tabatin 37% di tur e votonan. Remarcable aki tambe ta e hecho cu lider di partido AVP, segun e encuesta, a sali na di dos lugar como menos prepara, cu a haya 18% sigui pa lider di UPP cu a haya 12%. 

PA KEN VOTA

Tambe tabatin e preguntanan di si bo sa awor pa cual partido o ta bay vota, y aki 78.20% a bisa cu si, mientras cu e di dos grupo tabata esun indeciso, cu no sa ainda pa ken nan vota, cu tabata 14.23%. E grupo cu no sa ainda tabata 7.57%. Y gran mayoria di esnan cu a participa na e encuesta, no a cambia di pensamento cu tabata 68.15%. Un 23.98% a bisa cu despues di e debate, nan lo cambia nan preferencia di voto. 

E ENCUESTA

Segun Camara di Comercio, e encuesta general a keda habri den un forma di ‘encuesta despues di debate’ te cu dialuna 7 di juni 12or di merdia, pa asina a duna e posibilidad na e personanan cu no a logra di vota e mesun anochi y pa ricibi mas feedback di comunidad despues di e prome edicion di debate 2021. Tambe Camara di Comercio ta sigura cu riba e plataforma interactivo di Setar, cu a estrena durante debate 2021 a ricibi un cantidad di mas cu 7000 participante (usuario di e plataforma), unda cu e usuario por a haya acceso sea door di scan e QR code of via e link https://debate.kvk.aw. E cifra aki no por a wordo comproba independientemente pa noticiacla. 

E PLATAFORMA

E plataforma segun Camara di Comercio, a enfoca riba un intercambio cu televidentenan ‘Live’ na cas, unda participantenan activo riba e plataforma por a sigi e secuencia di e debate y asina nabega di un tanda pa e siguiente tanda contestando varios pregunta den un periodo di tempo asigna. E resultado final di e plataforma ta basa riba e participantenan cu tabata activo y cu a duna nan contesta riba e encuesta di 5 pregunta despues di tanda 3. Mas o menos mitar di e cantidad di usario di e plataforma a vota/contesta e preguntanan 1 te cu 5 di e encuesta despues di tanda 3.

SIGUIENTE DEBATE

Pa e siguiente debate lo laga e plataforma aki habri durante henter e debate, pa facilita tur hende pa vota na momento nan ta desea. E informacion y graficonan ta cortesia di e Facebook page di Camara di Comercio. 

Share on facebook
Share on Facebook
Share on whatsapp
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.