fbpx
June 22, 2021

Ruben Geerman ta denuncia: Polis a destrui cura di su cria y a bay cu su porconan

Share on facebook
Share on Facebook
Share on whatsapp
Share on Whatsapp
0
0
Ruben Geerman ta denuncia: Polis a destrui cura di su cria y a bay cu su porconan
Ruben Geerman ta denuncia: Polis a destrui cura di su cria y a bay cu su porconan


Ruben Geerman a keda sumamente disgusta cu loke polisnan a haci riba su propiedad na San Nicolas, unda e ta cria porco.

Mientras cu e tabata na trabou y su yiu, kende ta encarga, tabata na e sitio, polisnan a yega y sin ningun ordo a haci uzo di un mashin pa destrui e curanan di porco. E ta lamenta esaki pasobra e por corda hopi bon cu na 2011 y 2017 a horta su bestianan y apesar di denuncia, nunca a haci nada p’e.

Den oranan di merdia el a haya yamada di un funcionario policial, kende a puntr’e si e ta cria porco. A bis’e cu tin porco morto, siendo cu ora el a bay tur tabata bon. E porco morto no tabata cos di e dia ey, pero algun dia prome. Mesora nan a inform’e cu ta bay confisca tur e porconan. Awo e tristo ta cu e polis a bisa su yiu, drecha e luga y lo haya e bestianan bek. E luga, el a splica, cu e dak ta di material duro. Y prome hasta a bisa, cu no por cria bestia mas. Ta hopi placa, el a bisa, a gasta den material pa traha e luga, cu tin porta di hero y cura di bloki.

Anochi ora cu el a yega su cas, a mira cu enberdad nan a bay cu su porconan.

Ta normal, el a splica, cu ora e porconan ta bay haya yiu, ta saca nan for di cura. Por sosode cu nan mes ta trapa nan yiu mata. Na februari ultimo mes el a perde dos porco (mama) y a tira nan den mondi pa laga nan seca. “No ta berdad cu e porconan ta muri di hamber,” Geerman a bisa. Y recientemente e tabatin un poco di 300 kilo cu a muri.

E ta lamenta cu Polis a tuma e decision ey, pasobra nan no sa nada di cria. Si ta personal di Santa Rosa a bini, lo por a bisa cu e porconan ta bon cria y ta bon gordo. E porconan confisca na final, e ta kere, ta bay pa trahadonan di abattoir mes of amigonan.

E no por compronde di con ta kibra e luga y ta bisa nan trah’e di nobo pa haya e bestianan.

Criamento di bestia no ta algo cu el a cuminsa cu ne awe. E ta algo cu nan ta haci di tempo di su tata. Loke cu a pasa awo e ta haya algo inhusto, pasobra ni chens pa duna su reaccion el a haya. Awo a kibra miles di florin na material.

Ruben Geerman awor ta bay cana e caminda pa mira kende ta para responsabel pa e destruccion.

 

 

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.