fbpx
July 30, 2021

Armando Lampe (RED): Nos a cumpli cu tur e metanan poni pa enseñansa

Share on facebook
Share on Facebook
Share on whatsapp
Share on Whatsapp
+1
0
Armando Lampe (RED): Nos a cumpli cu tur e metanan poni pa enseñansa
Armando Lampe (RED): Nos a cumpli cu tur e metanan poni pa enseñansa


E interes ta grandi bou hobennan cu kier sigui studia na Hulanda. Esaki ta e caso tambe pa studia Higher Education Online. Ta evaluando pa pone personal extra pa atende cu e grupo grandi cu ta interesa. Awo ta den e ultimo fase pa trece cambio den e cuadro legal, di Arubalening, pa e studiantenan por aplica pa e estudio online tambe. E cambio ta pa e hobennan por haci nan estudio online aki na Aruba y haya prestamo pa cumpli cu nan gastonan.

E tendencia aki ta cumpliendo cu un di e propositonan cu el a pone na momento cu el a asumi e puesto di Minister di Enseñansa, Minister Lampe a bisa. Esta di aumenta e cantidad di personanan local cu tin un educacion superior. Aruba a keda hopi atras compara cu otro paisnan. Na Hulanda e cantidad di personanan cu un diploma di HBO ta riba 30%; Israel ta 45% mientras cu na Aruba e tabata 3% bou di esnan naci na Aruba. Pa hopi tempo CBS tabata señala riba e mesun punto cu ta inverti hopi den enseñansa pero e grado di estudio di e poblacion ta keda abou. Pero cu tur e cambionan ariba menciona, por spera cu e cifra di poblacion cu un estudio superior ta bay cuminsa subi tambe.

El a menciona di un firmamento cu a tuma luga recientemente pa e programa All U can Learn, cu ta bay wordo introduci den scolnan secundario, pa studiantenan prepara nan mes pa e era digital.

Cu orguyo, e mandatario a bisa, a cumpli cu un di e ultimo puntonan poni den e acuerdo di gobernacion, pa loke ta su Ministerionan. A firma acuerdo cu Universidad di Aruba y Instituto Pedagogico di Aruba, pa yega na un miho cooperacion cu otro. E pensamento ta cu den futuro e institutonan aki por merge cu otro, creando solamente un comunidad academico pa Aruba. E ta e miho forma, segun Minister Lampe, pa enfrenta e competencia cu tin eyfo riba tereno di educacion digital (estudio avansa). “Di e forma aki nos a cumpli cu e acuerdo di gobernacion. Pa nos ta hopi importante cu ora bo firma un acuerdo di gobernacion, como Minister bo no ta ehecuta bo caprichonan pero un acuerdo di gobernacion cu a wordo firma door di e partidonan den coalicion. Di e forma aki nos a cumpli cu un di e ultimo puntonan cu tabata parti di e acuerdo, pa loke ta Ministerio di Enseñansa.”

Siguiendo riba e tema di Enseñansa, e mandatario a bisa cu tambe a cumpli cu e promesa cu esnan cu gradua di SPO ta haya un diploma. “Esaki a bira un realidad pa prome biaha. Nos ta bay entrega un diploma na e muchanan cu gradua di SPO, cu antes tabata un haya un certificado. Esey tabata un descriminacion y a kit’e,” Minister Lampe a splica.

Siman pasa a haci inversion adicional den ex Emma School pa Internet y a firma pa pone un cura completamente nobo, cual tabata necesario. Esun actual ta den mal estado. Pa Scol Paso pa Futuro a firma pa pone un instalacion nobo pa airco pa henter e scol. A firma tambe pa un renobacion miyonario pa Scol Prepatorio y Basico Washington, di cual un gra parti ta bay pa renobacion di dak di e scolnan. Esaki lo sosode den vakantie grandi.

Tambe e mandatario a menciona cu Gobierno a ofrece un suma cuantioso na SKOA pa renobacion di St. Aloysius School, pero no a haya contesta ainda. E mandatario a bisa di ta lamenta cu nan ta ofrece placa pa haci renobacion y no ta haya ni contesta. Tur scol publico a haya DigiBoard pa duna un educacion di tempo moderno, pero di e comision ey tambe SKOA a sali afo.

“Di e forma aki nos a cumpli cu nos a bisa di inicio. Nos ta corta vet for di e presupuesto di enseñansa. Unda placa no ta wordo uza eficientemente, ta realoca esey den innovacion. Esaki ta algo cu no a tuma luga pa hopi aña. P’esey a firma recientemente pa diferente proyecto innovativo manera continuacion di  e proyecto pa e scol digital pa migrantenan, cu ta wordo ehecuta door di Stichting SOAZA. Tambe mi por bisa cu na december awo lo tin e prome graduadonan di e sistema di educacion aki, esta Bachillerato, despues di apenas un aña di existencia. Despues di esaki nan por sigui pa universidad, pasobra nan a gradua di un programa acredita di Dawere di UN. Nos a cumpli cu e vision, cu e hobennan cu ta bini di nan pais ta haya chens pa finalisa nan scol secundario. Nan ta haya e chens pa sigui estudio na un universidad sin perde aña manera den pasado. E tabata necesario y nos tabatin rason pa impulsa e proyecto aki, “ Minister Lampe a bisa.

El a agrega cu Edu Campus, e prome scol virtual completamente na Ingles ta un exito. Y hasta a bira scol internacional, pasobra tin personanan di Corsou, Colombia y Hulanda ta inscribi na e scol aki na Aruba

Share on facebook
Share on Facebook
Share on whatsapp
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.