fbpx
July 30, 2021

Lampe: Premier Wever-Croes a comete abuso di poder

Share on facebook
Share on Facebook
Share on whatsapp
Share on Whatsapp
0
0
Minister Lampe ta acusa Premier Wever Croes di abuso di poder
Minister Lampe ta acusa Premier Wever Croes di abuso di poder
Lampe: Premier Wever-Croes a comete abuso di poder
Posted on 07/20/2021 10:39 am AST | Updated on 07/20/2021 10:41 am AST

ORANJESTAD – Prome minister demisionario Evelyn Wever Croes a comete abuso di poder. Asina minister demisionario di Enseñansa Rudy Lampe a bisa dialuna despues di a sali for di oficina di VNO (representacion di Gobierno Hulandes na Aruba). Segun Lampe, e ta referi na e hecho cu e premier demisionario den conseho di minister a dicidi contra regla, pa revoca algun decision cu Lampe a tuma pa loke ta enseñansa. Lampe ta considera esaki un ehempel ‘clasico’ di abuso di poder, pasobra conseho di minister segun Lampe, no tin autoridad pa haci tal. Premier Wever awe mainta no tabata disponibel pa comentario debi cu e tabata den reunion como formador. 

DREI BEK DECISION

Segun Lampe, loke a sosode ta cu contra tur regla, conseho di minister recientemente a para varios decision di e mandatario demisionario di enseñansa manera mudansa di Beatrix School, e MAVO 3 etc. “Esaki no ta refleha union den gobierno” e mandatario di enseñansa a sigui bisa. Lampe ta considera su decisionan tuma como ‘lopende zaken’ y como tal e tabatin tur derecho pa tuma e decisionan tuma, cumpliendo cu preparacion pa e proximo aña escolar. Cu esaki a viola un regla basico di conseho di minister cu no tin autoridad pa tuma tal decision, seun Lampe. Cada minister, e mandatario ta sigui bisa, ta personalmente responsabel pa su ministerio. 

RESPETA DECISION

Asina mes, Lampe ta sigui bisa, e si a respeta e decision y a coopera cu e cambionan cu a tuma lugar, pasobra e si ta considera cu ta un gobierno tin y no mas. E loke cu conseho di minister a haci, tambe segun Lampe, ta contra e palabracion cu Aruba tin cu Hulanda pa loke ta e landspakket riba e parti di enseñansa ya cu e cambionan haci lo tabata parti di e pakete y awor esey ta cambia. 

PARADA

E mandatario demisionario a sigui mustra cu e resultado di eleccion recien di dia 25 di juni a mustra cu e tres partidonan den coalicion actual a perde, incluyendo su partido RED, y asina mes e partido MEP a bay tene un parada di victoria, mientras cu nan a perde voto,. Esaki ta contra boluntad popular, unda cu esun cu a gana (oposicion) ta esun cu mester a tene e parada y no MEP. Potret cortesia screen shot Bo Informador. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.