fbpx
July 30, 2021

Fundacion pa nos muchanan: Con pa siña mi yiu comparti cu otro mucha?

Share on facebook
Share on Facebook
Share on whatsapp
Share on Whatsapp
0
0
Fundacion pa nos muchanan: Con pa siña mi yiu comparti cu otro mucha?
Fundacion pa nos muchanan: Con pa siña mi yiu comparti cu otro mucha?


Hopi biaha ora un mucha ta entre e edad di 2 pa 8 aña ta normal cu muchanan no kier comparti cu otro, paso den e edadnan aki nan ta defende loke ta di nan.

Ta importante pa nan sa cu comparti cu otro no kiermen cu nan ta perde algo. Siña comparti cu otro por ta un desafio, pero e ta un desafio cu bo yiu mester por enfrenta y supera.

Comparti y Edad

Un mucha di 2 aña probablemente no lo compronde e concepto di comparti. Por ehempel, si un otro mucha tin algo cu bo yiu kier, bo yiu kisas no lo compronde dicon nan mester warda pa haya e co’i hunga. Tambe, comparti kiermen cu muchanan mester por maneha nan emocionnan, y muchanan cu ta rond di 2 aña recien a cuminsa siña con pa haci esaki.

Na edad di 3 aña, hopi muchanan lo cuminsa compronde e aspecto di tuma turno y comparti. Por ehempel, bo yiu lo por compronde cu comparti ta e cos husto pa haci. Pero hasta asina e por ta dificil pa nan comparti, specialmente si nan tin cu comparti algo cu un otro mucha.

Pa tempo nan yega e edad unda nan ta cuminsa bay scol, nan lo cuminsa compronde cu otro persona tin sentimentonan tambe. Esaki kiermen cu tin mas probabilidad cu nan lo comparti y tuma turno, aunke cu kisas e lo ta duro ainda pa nan pa comparti nan co’i hunga of wega faborito.

Dicon comparti cu otro ta importante pa mi yiu?

Na prome luga e ta un habilidad cu ta importante cu e mester pa e hunga y por beneficia di e interaccion cu otro muchanan. E ta yuda nan crea amistad, hunga cooperativo, haya turno, negosha y siña anda cu desapuntonan. Nan ta siña cu si nan duna un tiki na otro nan por haya algo cu nan kier a cambio. Comparti ta crucial pa nan siña anda cu otro, y e ta bira mas importante ora e mucha drenta bira un peuter y kleuter y cuminsa bay scol.

Con pa siña bo yiu comparti cu otro:

  • Ta un bon ehempel pa bo yiu, por ehempel, ora bo ta come algo, comparti esaki cu nan.
  • Papia cu nan tocante “dicon comparti cu otro ta bon”, bisando por ehempel: “Comparti co’i hunga cu otro ta haci cu boso tur por disfruta di e mesun co’i hunga”’
  • Uza diferente personanan cu sa comparti bon cu otro como un ehempel, bisando por ehempel: “Bo amiga a comparti su co’i hunganan cu otro mucha, esey ta amabel di su parti.”
  • Ora bo wak cu bo yiu ta purba comparti of haya turno, dun’e diferente compliment of reconocemento, por ehempel: “Mi a gusta con bo a comparti bo trein cu Iza. Hopi bon!”
  • Hunga diferente weganan cu bo yiu cu ta implica comparti cu otro y haya turno, por ehempel: “Awo ta mi turno pa tira e bala, despues lo ta bo turno”. 
  • Papia cu bo yiu tocante di comparti cu otro prome cu e bay hunga cu e muchanan, por ehempel: “Ora Iza yega cas, corda comparti algun co’i hunga cu ne pa e tambe por hunga.”
  • Papia cu e yiu tocante di comparti cu otro, prome cu e cuminsa peuter of kleuter
  • Bo por yud’e scoge e co’i hunganan cu e lo kier comparti
  • Purba di compronde dicon e mucha no kier comparti algo cu otro mucha, kisas ta paso net e articulo ey tin hopi balor sentimental p’e.
  • Tin pasenshi, tin mucha cu no ta bon den comparti cu otro,pero cu durante tempo ora nan cuminsa desaroya nan habilidadnan social, e lo bira miho den esaki 
  • Siña nan cu “comparti” no solamente kiermen intercambia of comparti algun obheto, pero tambe comparti tempo y atencion pa otro. Por ehempel: tempo pa conta un storia, atencion cu ta ricibi di otro of ta duna na otro

Ora comparti ta un reto pa bo yiu
Si bo yiu ta hay’e dificil pa comparti cu otro, e ta un bon idea pa keda cerca di dje ora e bay hunga cu otro mucha, y encurasha bo yiu pa asina nan no lubida pa comparti. Ora bo yiu comparti cu otro mucha, bo por bis’e exactamente kico e la haci bon y con orguyoso bo ta di dje.

Si bo yiu ainda ta siñando con pa comparti cu otro mucha, no kiermen cu mester evita situacion nan unda bo yiu lo mester hunga cu otro muchanan. Enbes, uza momentonan asina pa yuda bo yiu practica comparti cu otro mucha. Fuente:https://raisingchildren.net.au/toddlers/behaviour/friends-siblings/sharinghttps://lamenteesmaravillosa.com/7-claves-para-ensenar-a-los-ninos-a-compartir/

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.