fbpx
July 30, 2021

Mayoria kier Tevreden y no Croes como minister

Share on facebook
Share on Facebook
Share on whatsapp
Share on Whatsapp
0
0
Mayoria kier Tevreden y no Croes como minister
Mayoria kier Tevreden y no Croes como minister


Un encuesta awe merdia riba 24ora.com durante e noticiero estelar “Enfoke” entre 12:00 pm pa 2:00 pm a saca afo cu mayoria di nos oyente y usuarionan ta prefera Hendrik Tevreden como minister. Nos encuesta tabatin cuater opcion como contesta riba e pregunta “Ken abo kier mira den e puesto di minister?”

Oyentenan por a scoge entre Rocco Tjon, Arthur Vallejo, Hendrik Tevreden y Endy Croes. Mester bisa cu den e cuater candidatonan aki, Endy Croes ta esun cu mas voto y e unico cu a bay dilanti den voto banda di Evelyn Wever-Croes. Pero riba lista e ta esun mas abou riba lista, esta # 8, cu consecuencia cu pa scoge como minister lo mester salta tur e tres otronan prome. 
A consulta cu pueblo scuchando noticia merdia y e resultado ta lo siguiente: 
Rocco Tjon – 3%Arthur Vallejo – 27%Hendrik Tevreden – 68%Endy Croes – 1%
E resultado di e encuesta ta papia un idioma cla pa comunidad. E candidato menos popular pa e puesto ta Endy Croes, cu solamente 1% di sosten mientras cu esun mas gusta y preferi ta Hendrik Tevreden cu bo menos di 68%. Ta obvio cu e ultimo aki a convence e oyentenan mas, pa su integridad, seriedad y sinceridad. Contrario na Croes cu tabata un sospechoso di husticia den pasado, a bay cera durante e investigacion y a perde su casonan pa a kit’e di su funcion na Lotto pa Deporte pa mal maneho. 

Tocante Partido MEP

Gilberto F. “Betico” Croes a funda MovimientoElectoral di Pueblo (M.E.P) dia 9 di Februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyna Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e ultimo eleccion na juni 2021, partido MEP a logra 20.700, bon pa 9 asiento den Parlamento. Nan ideologia ta Social democrata.

Tocante Hendrik Tevreden

Ta bin for di e districto di Dakota y a participa den eleccion di 2017 caminda a obtene 792 voto, formando asina parti di e fraccion di e partido den Parlamento durante ultimo cuater aña. E ta regresa pa un di dos termino despues di ricibi 670 voto den e eleccion di 25 di juni ultimo. Ademas di Parlamentario, Tevreden tambe ta president di e partido geel. 

Tocante Endy Croes

Croes ta drenta su di tres termino como parlamentario. Riba su perfil online ta figura cu na 1989 el a obtene su MBO como analista kimico y na 1991 el a obtene su Associate’s Degree den e mesun ramo. E tabata president y despues director di Fundacion Lotto Pa Deporte, promotor di evento, president di Aruba Softball Bond y vice president di World Baseball Softball Confederation. Na ultimo eleccion el a obtene 1.006 voto, un crecemento di 156 voto compara cu eleccion 2017.

Status di coalicion

Dia 25 di juni 2021, Aruba a vota pa di 11 bes pa e Parlamento di Aruba. E resultado a sali na fabor di partido MEP cu 20.701. Na aña 2017 nan a saca un total di 22.078, pues e partido a bay atras cu 1.377 voto. Un total di 7.518 voto tabata p’e lider di partido, logrando asina bira e prome votegetter femenino di nos isla. Partido AVP a bay di 23385 voto pa 18.348, pues a bay atras cu 5.037 voto. Otro partido cu e bay atras tabata e partido POR lidera pa Alan Howell. POR a saca 661 voto, na 2017 e partido tabatin 5.531 voto, pues a bay atras cu 4.870 voto. 

Esaki ta pone cu e perdedor di mas grandi di eleccion 2021 tabata partido AVP p’e cantidad di voto perdi. Un di e sorpresanan di mas grandi pa cu e eleccion tabata partido MAS lidera pa drs. Marisol Lopez-Tromp. E partido a mira un crecemento di 4.394 voto, di cual 4.191 di e votonan aki tabata pa e lider di partido. RAIZ lidera pa Ursell Arends a participa pa di dos biaha den eleccion parlamentario, na aña 2017 nan a logra haya sosten di 2.107 persona, e aña aki e sosten a subi na 5.481 pues a mira un crecemento di 3.374 voto. Accion21 ta un partido nobo, bou liderazgo di Miguel Mansur, pa nan prome eleccion e partido a logra un total di 3.403 voto di cual 2.019 tabata pa Miguel Mansur

E reparticion di asiento a bay 9 pa MEP, 7 pa AVP, 2 pa MAS, 2 pa RAIZ y 1 pa Accion21. Dia 5 di juli, Gobernador di Aruba, Alfonso Boekhoudt a nombra Tisa LaSorte y Eddy Werleman como informado. Nan tarea tabata pa hiba varios ronda di consulta cu consehero y e lidernan di partido politico cu durante eleccion a logra haya un of mas asiento den Parlamento di Aruba. 

Dia 9 di juli, Gobernador di Aruba a nombra mr. Evelyn Wever-Croes como e formado di gobierno.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.