fbpx
July 30, 2021

Prome minister a haya su mes obliga di para dos decision di Rudy Lampe

Share on facebook
Share on Facebook
Share on whatsapp
Share on Whatsapp
0
0
Prome Minister: Minister Lampe mester compronde cu e ta demisionario
Prome Minister: Minister Lampe mester compronde cu e ta demisionario


Minister Rudy Lampe diamars a lansa un atake feroz contra Prome Minister mr. Evelyn Wever-Croes, entregando un carta na gobernador pidiendo pa pone e ministerio di enseñansa bou curatela. E motibo segun Lampe, ta cu prome minister a dicidi di para dos decision recien di Lampe. 

E prome ta un decision pa saca un parti di Scol Reina Beatrix y prop nan den edificio di Scol Paso pa Futuro. A avisa Wever-Croes di e plannan aki di e mudamento, door di e mayor- y docentenan preocupa y malcontento principalmente pasobra no a consulta cu nan. 

“Mi a haya mi obliga na tuma e decision aki pasobra e mudamento aki no ta un ‘lopende zaak’. E ta un cambio drastico pa ambos scol y ta algo cu e minister demisionario mester laga pa e minister nobo tuma over. Demas miembro di conseho di minister tabata di acuerdo cu mi y nan a sostene e decision. Pues ta un decision legitimo durante un periodo demisionario”, e prome minister a duna di conoce. 

E di dos decision cu tambe a bay asina, tabata otro decision hopi recien di Minister Lampe pa diripiente crea un Mavo school na Colegio Nigel Matthew na San Nicolas, cual ademas lo tin un impacto negativo riba demas scolnan Mavo na San Nicolas. E minister mes a bisa cu tin scarsedad di docente y cu no tin hopi studiante. Pues esey ta haci e decision di crea un Mavo diripiente asina, ainda mas ilogico.

“Mi ta compronde cu colega Lampe no a gusta cu conseho di minister a overrule e, pero loke e colega aki mester compronde cu no ta pasobra nan a perde eleccion, regla no ta conta p’e. Mi ta percura pa nos Gobierno haci un traspaso debido, cu un ‘overdrachtsdocument’ debido y sin cu nos ta mara e ministernan nobo na decisionnan tuma durante e periodo demisionario. Pa mi integridad y bon gobernacion no ta solamente palabranan. Nan ta forma di traha y biba. Mi a baha gobierno pa motibo di integridad y mi ta determina pa practica e reglanan di bon gobernacion te na final.

Esey kiermen cu un minister no por implementa cambionan drastico durante periodo demisionario. Claro cu mi ta lamenta cu colega Lampe ta haciendo esaki. Ta e tin algun dia caba ta purba ataca mi y mancha mi reputacion. Pero mi ta kere cu pa awo tur hende sa ken ta ken”, prome minister Wever-Croes a duna di conoce.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.