fbpx
September 21, 2021

Frank na Eman: Agenda personal y politico pa bula cabes di directornan di WEB

Share on facebook
Share on Facebook
Share on whatsapp
Share on Whatsapp
0
0
Frank na Eman: Agenda personal y politico pa bula cabes di directornan di WEB
Frank na Eman: Agenda personal y politico pa bula cabes di directornan di WEB


Asociacion di Empleadonan cu un contrato individual na W.E.B. Aruba N.V. (VWI) a tuma nota di e rueda di prensa di Gobierno, di ayera 28 di juli 2021, den cual Ing. Richard Eman, director interino di Utilities Aruba N.V., a duna un relato. Tambe VWI a tuma nota di un cantidad di acusacionnan contra e dos directornan di WEB cu a sali publica den e matutino Diario y tambe den Solo di Pueblo. Ora prensa a puntra Richard Eman kico ta e motibonan pa ta considerando pa kita e directornan di WEB for di trabou, Eman no kier a bay den detayes.

E berdad ta cu Eman no por bay den detayes pasobra, te cu VWI ta na altura, no tin motibonan real pa kita e directornan for di trabou. Tambe a sali publica den prensa cu e directornan di WEB lo ta tranca e proceso di negociacion cu e empresa proveedor di gas natural liquido (LNG), esta EAGLE LNG. E acusacion aki tampoco ta cuadra cu e realidad.

VWI ta representa mas cu 75% di e staff di WEB y nos miembronan ta cerca y conoci cu kico ta e berdad di loke ta pasando cu e asunto di LNG y cu e asunto di RECIP. E declaracion di Richard Eman, bisando den e rueda di prensa, cu ta WEB mes a para su proceso pa adkiri LNG tampoco ta cuadra cu berdad. E acusacionnan vil y baho den e medianan di prensa (liga na gobierno) contra e dos directornan di WEB no solamente ta atacha e bon reputacion di e directornan, pero tambe ta atacha e reputacion di tur nos miembronan y trahadonan general di WEB. VWI ta condena categoricamente e campaña publico sushi y baho aki contra di e dos directornan y contra WEB en general.

No ta prome biaha cu e asociacion di trahadonan di WEB cu contractnan individual, mayoria managernan, ta sali pafo pa expresa nan malcontento cu maneho y metemente di Gobierno y/of Utilities Aruba NV. Den pasado a mete den maneho financiero y fiamento di placa pa WEB y despues den e asunto di cambio pa gas. Ta parce cu forsanan pafo di WEB pero cu tin interes den e negoshi di gas ta pushando e compania estatal den un direccion unda e no kier bay. Trahadonan ta determina cu si Gabinete Wever-Croes no recapacita, cu lo yama welga general na e compania di produccion di awa y coriente.

No ta keda VWI nada otro di conclui cu aki tin forsanan siniestro ehecutando un agenda personal of politico cual ta encera e terminacion di e dos directornan pa por realisa nan propio agenda. VWI lo sigui monitor e desaroyonan aki di cerca y si ta necesario nos lo responde den e forma adecuado. Den nomber di nos miembronan, Directiva General di “Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V.”, cu ta consisti di Richard Frank como presidente, Michael Lin como secretario, Edsel Vos como tesorero, mientras cu Leonardo Reyes y Giovanni Tromp ta miembro di e directiva.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.