Ta birando casi un “normal nobo” cu diariamente polis ta presenta na diferente adres pa casonan di tiramento. Principalmente pa habitantenan cu ta scucha e tiro. Un rato pasa alrededor di 12:20 am polis a presenta den e area di Papaya, caminda cu por lo menos un famia a scucha cinco tiro.
Mas trempan caba, polis a bay pa mesun tipo di asistencia den Madiki Kavel, caminda varios habitante a scucha dos tiro. E biaha ta den Papaya, polis a core rond den e area p’asina check si ta topa cu cualkier movecion straño pero sin resultado. Ta pa e mesun motibonan aki, ta aumenta control den fin di siman, pero ta parce cu ta den siman e malechornan ta los tiro, pa laga sa cu nan t’ey y ora polis ta controla den weekend, nan ta sconde e arma.
Polis, Ministerio Publico, Veiligheidsdienst Aruba y Ministerio di husticia ta na altura cu arma di candela ta circulando manera kipashi riba nos isla, por spera mas accion di parti e cadena hudicial riba nos isla.
