fbpx
September 21, 2021

Rafael Garcia a gana competencia di Arte di Palabra

Share on facebook
Share on Facebook
Share on whatsapp
Share on Whatsapp
0
0
Rafael Garcia a gana competencia di Arte di Palabra
Rafael Garcia a gana competencia di Arte di Palabra


Diaranson dia 28 di juli 2021, a tuma luga e competencia di Arte di Palabra na Cas di Cultura. Esaki ta un competencia pa studiante di scol secundario den poema, storia cortico como tambe haikus. E competencia ta tuma luga tur aña desde aña 2000 na Corsou, cual a bin cu e iniciativa pa asina celebra cu Papiamento a bira un materia obligatorio na scol secundario na Corsou y Boneiro. 

E preseleccion ta tuma luga riba e islanan ABC, e competencia final ta tuma luga na Corsou. Sinembargo, dos aña pasa ora cu Aruba a cumpli dies aña competiendo den esaki, a haci un peticion pa host e evento na Aruba. Aña pasa el a tuma luga na Boneiro pero pa motibo di pandemia, Aruba no por a participa. E aña aki a toca turno pa Aruba bolbe ta anfitrion di e evento aki.

Julie Merencia, hefe di seccion di implementacion di departamento di cultura y lider di e proyecto Arte di Palabra, a conta cu e evento tabata un exito rotundo. E ta sumamente satisfecho con e evento a cana, tabatin un total di trintiun obra y bintinuebe participante. El a splica cu locual ta haci e competencia aki bunita ta cu e tres islanan tin diferente tono y accento pa cu e lenguahe di Papiamento pero al final, tur ta compronde otro. El a termina bisando cu e ta spera di por sigui haya e apoyo di e pueblonan di Aruba, Boneiro y Corsou pa cu e evento aki, “paso ta bunita pa mira con e hobennan aki ta expresa nan mes den nos idioma riba tarima”. 

Ange Jeserum, presidente di fundacion Arte di Palabra, kende a bin cu e iniciativa di e proyecto aki a expresa su orguyo pa cu e evento. E ta conta cu por a mira con cada aña e evento aki ta crece y cu ta bunita pa mira con Papiamento ta un idioma criyoyo prestigioso, “caminda no tin distinccion di rango ni di color, tur hende ta papi’e. No tin nada mas dushi cu sinta awenochi y disfruta di creatividad riba e scenario, e ta algo indescribibel”. Por cierto, a dedica e competencia di e aña aki na Ange Jeserum, kende a bin cu a inicitiva aki binti aña pasa. A termina gradiciendo tur e docentenan y tur otro persona cu ta sostene e evento y como tambe pais Aruba pa e hospitalidad. 

Jonathan de Windt, coach di Arte di Palabra di Boneiro a keda sumamemente satisfecho cu e resultado di e competencia ya cu nan a logra bay cu varios premio. Segun de Windt “na momento cu bo difruta di loke bo ta presenta, bo ta mira resultado”. Como delegacion nan a dicidi di traha y yuda otro den e forma di team-building. E coach a termina curashando mas hoben, di tanto Aruba, Boneiro y Corsou, pa participa den Arte di Palabra paso e ta un sentimento sumamente dushi y di su banda e tambe lo bay sigui duna su granito di aporte pa cu esaki.

E competencia a consisti di e categorianan di poesia existente, cuenta existente como tambe poesia original y cuenta original. Pa e categoria A di poesia existente di klas 1-2 e ganado tabata Ramso Coffie di Boneiro, Coffie a logra gana den categoria B tambe, esta poesia original klas 1-2.

Pa categoria C esta, esta poesia original klas 3-6 e ganado tabata Irlenska Martinus di Bonerio, meintras e ganado di categoria D, cuenta existente klas 1-2 tabata Jeaniro Dorotea di Boneiro.

Den e categoria E, cuenta original klas 1-2 e titulo di ganado a bay pa Guizza Steenvoorde di Aruba y e ultimo categoria F, cuenta original klas 3-6, e ganado tabata Rafael Garcia di Aruba.

Den tur competencia tin un ganado absoluto, pa e anochi aki el a keda den nomber di Rafael Garcia di Aruba. Rafael a conta cu esaki ta su di shete biaha participando den Arte di Palabra y e aña aki tabata su ultimo participacion pa cu e competencia. El a conta con su obra, titula ‘Dicon’ a conta su priopio storia di depression y a trece dilanti un mensahe pa e publico. E ta curasha y recomenda tur hoben pa participa den e competencia aki. El a clausura gradiciendo e organision di Arte di Palabra ABC pa lag’e trece su mensahe dilanti y tur otro persona cu di un manera of otro a yud’e den e ultimo shete añanan: “esaki ta pa boso”.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.