fbpx
September 21, 2021

Prome minister demisionario: Cada parlamentario ta responsabel pa mantene respet pa otro

Share on facebook
Share on Facebook
Share on whatsapp
Share on Whatsapp
0
0
Prome minister demisionario: Prome minister demisionario
Prome minister demisionario: Prome minister demisionario


Conhuntamente cu e ministernan di Gabinete Wever–Croes 1, Prome minister demisionario mr. Evelyn Wever-Croes a asisti na e apertura di Aña Parlamentario 2021/2022 diamars mainta 14 di september. Prome minister demisionario a laga atras su mensahe pa cada parlamentario pa cu e Aña Parlamentario nobo enfatisando cu cada parlamentario mester percura pa mantene e confiansa cu pueblo a pone den parlamento.

“Cada parlamentario mester percura pa e confiansa aki keda manteni na laira. Pasobra pueblo a demostra cu e confiansa den e parlamento a bin ta aumentando den e ultimo tempo. Pueblo tin su aprobacion y desaprobacion. E confiansa cu tin den parlamento, ta keda na cada parlamentario pa dicidi si ta mantene of si ta permiti pa esaki bay perdi. Ta responsabilidad di cada parlamentario pa mantene e respet pa otro y respet pa diferencianan di ideologia, diferencia di opinion y diferencia politico.

Cu respet bo ta gana confiansa. Esey ta hopi importante. P’esey ora cu ta scucha e parlamentarionan ta instiga contra otro, trece e mentiranan contra otro y papia di venena otro y mas, mi ta lamenta esaki. Mi mes tabata 8 aña den parlamento y despues 4 aña den gobierno, y mester bisa cu e respet cu tin pa Parlamento a bin ta aumenta, pero tipo di actonan asina specialmente e parlamentarionan hoben y nobo ta papia di venena otro, ta algo cu lo bay tin su consecuencianan. E consecuencia di e comportacion aki den Parlamento, ta cu e ciudadano ta bay perde e confiansa y respet cu e mester tin pa e Parlamento. Tur e trabou cu a bin ta haciendo, den un frega di wowo ta bay perdi di e forma aki.

Y p‘esey mi ta boga pa ora cu ta debati cu otro, ora cu ta trece bo puntonan dilanti, trece nan substancia, basa riba berdad y no bay den e direccion di instiga mentira of bisa cu kier mira parlamentario morto of venena nan, pasobra esey ta un cos cu bo no ta haci y ta infantil y hopi peligroso. Confiansa ta un cos cu ta tuma tempo pa bo construi y traha riba dje, pero bo ta perde den un frega di wowo”.

Prome minister demisionario ta desea tur parlamentario exito den e Aña Parlamentario 2021/2022, y ta curasha nan pa sigui mantene e confiansa cu pueblo a deposita den cada Parlamentario pa asina nos pais por fortifica mas.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.