fbpx
October 24, 2021

Despues di 4 ora: Mathilda deteni na Cura Cabay

Share on facebook
Share on Facebook
Share on whatsapp
Share on Whatsapp
0
0
Despues di 4 ora: Mathilda deteni na Zeewijk
Despues di 4 ora: Mathilda deteni na Zeewijk


Despues di mas of menos cuater ora di persecucion, awe nochi nochi polis a logra detene e sospechoso di ladronicia di un waverrunner na e beach di Cura Cabay. E no tabata sa cu polis tabata sperando riba dje eynan y asina cu el a para e waverunner na tera, a sali riba dje y a deten’e mesora.

Tur cos a cuminsa den oranan di atardi, ora cu doño di un compania cu ta huur waverunner a informa polis cu nan a horta un di su vehiculonan. Ta trata di e waverunner cu number 10 riba dje. Nan a señala un homber di fam Mathilda como esun cu lo a bay cu ne. A informa polis maritimo cu a start un buskeda riba lama. No a dura mucho cu a logra topa cu e homber, pero el a nenga di stop.

E homber a tene polis ocupa pa un bon rato, bayendo pariba na altura di Pos Chikito, a muha e polisnan den boto y despues a bay bek direccion Noord. A bay Eagle Beach, sigui pa e beach na altura di Strand Politie, Marriott, Ritz Carlton y despues regresa. El a sigui bay ariba te banda di Rodgers Beach na San Nicolas pero a cambia di rumbo y a bay Cura Cabay.

Tur e tempo e helicopter di polis tabata bula riba e sospechoso y tabata no solamente lusa e waverunner pero tambe duna e demas polisnan indicacion di su locacion. Tabatin un ekipo di varios polis cu tabata sigui e homber for di tera mientras cu unidad di polis maritimo a conduci e persecucion riba lama.

Na Cura Cabay e no a conta cu polis tabatin un comision di recepcion ta spera riba dje, scondi den e mangelnan y cu luz di auto nan paga. Asina cu el a sinti su mes comodo na tera, nan a sali riba dje y a mand’e tera mesora pa deten’e. Ta considera e sospechoso como un sospechoso, conoci di husticia, pero cu den e caso aki awor ta sospecha di a joyride un waverunner.

Despues di su detencion, a transport’e pa ward’i polis di Noord, situa na Shaba. Ey lo present’e dilanti un subfiscal pa e duna cuenta di su acto y asina tende di e oficial si e ta keda encarcela pendiente investigacion of si lo lag’e den libertad pendiente su caso. Mester menciona cu na su yegada, el a bisa 24ora.com cu e polisnan mester a tuma entre cuater pa cinco ora pa por a gar’e, locual e mes a considera un berguensa pa e defensornan di ley.

E persecucion aki obviamente ta un di esunnan di mas caro di ultimo tempo. No solamente pa e cantidad di polis riba pia y riba lama tras di un solo homber cu a horta un waverunner, pero tambe pa e tempo cu henter e buskeda a tuma. Polisnan cu mester a keda traha, cobra overtime, e gasto di helicopter pa tanto ora largo asina den aire y combustibel pa e boto di polis cu a keda bay pariba y bin pabou bek tras di e mesun sospechoso.

Riba red social mesora a sali un cantidad di meme rond di e persecucion. Mientras cu un grupo ta pidi caba pa libertad pa Mathilda, otronan ta sinti cu e mester paga un castigo caro awo pa a horta y despues burla di autoridadnan policial. Pa comunidad na cas, nan a keda claba riba 24ora.com pa sigui e varios transmicionnan bibo di tur skina, pa mira con a busc’e, con a gar’e na Cura Cabay y despues con a entreg’e na ward’i polis di Shaba pa su encarcelacion pendiente e investigacion contra dje.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.