fbpx
October 24, 2021

PPA kier mira screening y presupuesto extra pa acomoda 8 minister

Share on facebook
Share on Facebook
Share on whatsapp
Share on Whatsapp
0
0
PPA kier mira screening y presupuesto extra pa acomoda 8 minister
PPA kier mira screening y presupuesto extra pa acomoda 8 minister


Despues cu Partido Patriotico di Aruba (PPA) a dirigi un carta na Conseho Electoral di Aruba referente e obligacion di tur partido pa raporta fuentenan di nan fondo di campaña, PPA a dirigi un carta tambe na minister-president cu copia pa presidente di Parlamento tocante e inkietud di e proceso di screening y nombracion di Gabinete Wever-Croes II. 

PPA a solicita informacion basa riba e “Landverordening houdende regels inzake openbaarheid van bestuur–LOB) riba documentonan di e proceso di screening di e candidatonan pa Minister di Gabinete Wever-Croes II. Tambe e gastonan den presupuesto pa acomoda e di ocho minister den e gabinete. 

Manera PPA a menciona, basa riba e stimulacion di integridad y transpariencia, ta bon pa trece claridad riba tur e inkietudnan cu ta biba den comunidad y pone esaki na luz pa por sigui padilanti. Aunke Minister President ta suheto na obligacion di privacidad pa ley, un opcion lo ta pa cada Minister pone nan informacion disponibel boluntariamente. 

PPA ta sinti den comunidad, promesanan pa cambio haci durante campaña electoral a keda cortico, referiendo na e Gabinete di 8 Minister y ta kere cu Gobierno mester duna e ehempel den momento di austeridad y reduccion di gasto. Maneha e pais cu menos Minister y laga hefe di departamentonan haci nan trabou manera PPA a boga p’e durante campaña. 

PPA ta spera cu minister-president y di Asuntonan General lo duna oido na e peticion aki y trece un discusion habri y transparente tocante e proceso di screening y nombracion di 8 minister. PPA ta recorda minister-president cu e mes a yega di expresa cu su  Gabinete lo ta forma pa 7 minister.  

Den un carta dirigi na Parlamento, PPA a felicita Presidente di Parlamento y parlamentarionan cu e periodo nobo nan dilanti. Tambe PPA a resalta e responsabilidad di Parlamento como organo mas halto di Aruba riba nan obligacion di salbaguardia bienestar di nos isla na prome luga. No permiti un “stempel parlament”, sino promulga cambio den nos sistema electoral y cambio di leynan anticua  cu ta stroba desaroyo di nos Pais.

Na mes momento a pone Presidente di Parlamento na altura di e solicitud na Minister di Asuntonan General/Formado di Gabinete Wever-Croes II pa informacion di e screening di candidatonan pa minister y riba gastonan real di mantene 8 minister. PPA ta di opinion cu Gobierno tin e obligacion pa reduci gastonan di gobernacion y mester  cuminsa den cas, tambe considerando e peso di algun ministerio compara cu otro, entre otro e super ministerio di Prome Minister, versus esun di e partner di coalicion. 

PPA a sigui e reunion di parlamento tocante e topico aki y ta lamenta cu e tratamento a bay na un nivel hopi abou y cu falta di madures politico. E pregunta principal mes no a haya contesta.  

PPA lo sigui traha, formando un organisacion politico serio, organisando un ‘Think Tank’ cu expertonan riba varios tema, segun nos plan di gobernacion presenta den nos programa politico. Tambe nos sistema di social media y website ta keda activo y nos lo publica ora nos tin un contribucion positivo pa haci of nos ta ripara cu nos gobernantenan ta fayando di cumpli nan promesa di campaña. 

Si acaso Bo ta desea di comparti cu nan, uni na e causa di Transformacion of yuda nan organisa y desaroya nan plataforma politico, anto por subi libremente riba nan website of contact nan via Facebook.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.