fbpx
November 30, 2021

Campaña “My Promise to Aruba” awor cu imagen nobo

Share on facebook
Share on Facebook
Share on whatsapp
Share on Whatsapp
0
0
Campaña “My Promise to Aruba” awor cu imagen nobo
Campaña “My Promise to Aruba” awor cu imagen nobo


Aruba Tourism Authority (A.T.A.) a cuminsa un siman nobo cu e reintroduccion di e campaña “My Promise to Aruba” – Mi Promesa na Aruba. Esaki ta un forma mas pa haci nos comunidad, bishitantenan y partnernan den e industria di turismo consciente y orguyoso di nan contribucion pa cuido y bienestar di nos isla. 

E presentacion na Ingles – dirigi di e manera aki na nos bishitantenan – riba Aruba.com ta cuminsa cu e palabranan “Mi ta priminti Aruba cu mi lo yuda preserva e isla aki pa futuro generacionnan”. Un expresion haci pa Bentley Adams di Bristol, Inglatera, un frase simpel cu ta deseo di tur residente y bishitantenan fiel y consciente. E imagen cu ta compaña e frase aki ta di un tortuga di lama, simbolo di durabilidad, di un bida largo y un di e programanan di preservacion di fauna mas importante cu Aruba conoce. 

Siguientemente por “scroll” door di un serie di promesa relaciona na elementonan cu ta parti di loke a y ta haci di nos isla y su hendenan famoso como “One Happy Island”. Tur ta factornan cu nos tur mester ta consciente di nan, pa nos isla por ta uno sostenibel, saludabel y prospero. 

A.T.A. a laga instala posternan cu escenanan bunita y impactante na e paradanan di bus den e area di Palm Beach, a inclui e campaña di promocion den e programacion di “When in Aruba” cu ta riba televisionnan den e cambernan di hotel rond Aruba, y lo por mira pronto tambe promocion den e revistanan cu enfoke riba turismo den nan edicionnan di 2022. Di e manera aki ta trata di yega na e bishitante y stimula conscientisacion di e importancia di yuda nos preserva nos isla. 

E campaña ta dirigi na un y tur y kier motiva y encurasha tanto turista como e residente pa actua di un forma ecologicamente y socialmente responsabel, pa asina contribui na e esfuersonan pa preserva e naturalesa, e flora y fauna y nos herencia cultural. 

Pa tur esunnan cu kier haci nan promesa na Aruba por haci esaki via www.aruba.com/promise. Por download e certificado cu bo nomber y pone esaki riba social media.

ATA a lansa “My Promise to Aruba” prome biaha na aña 2019, pa sostene y promove un codigo di conducta cu 10 regla y regulacion general cu ta motiva comportacion y consciencia poniendo enfasis riba e isla su balornan cu mas ta destaca. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.