fbpx
November 30, 2021

Pastoor Marcel Balootje: No tarda pa reconcilia

Share on facebook
Share on Facebook
Share on whatsapp
Share on Whatsapp
0
0
Pastoor Marcel Balootje: No tarda pa reconcilia
Pastoor Marcel Balootje: No tarda pa reconcilia


Den 2 Corintionan 5:19 ta bisa lo siguiente: “Esta cu Dios den Cristo, tabata reconciliando e mundo cu Su mes sin tuma nan picanan na cuenta. Y El a encarga nos cu e Palabra di reconciliacion.

Como hende hopi biaha despues di tabatin un discusion cu un persona nos ta keda sin papia, ni sikiera saluda y mas fuerte ainda nos no kier pordona, specialmente ora nos tin rason.

Mas ainda nos ta cana busca rason cerca otro persona y wak cuanto persona nos ta haya na nos banda.

Tin hende ta yega asina leu di bisa otro, pa no saluda un persona. Pasobra nan no ta bon cu ne.

Tur esaki ta fruta di rabia, odio y amargura den cual Dios no tin parti. Pero bo ta dunando e enemigo cuminda. Pasobra ta solamente diabel ta gosa caminda tin pleito, violencia, falta di pordon, etc.

Mas tanto nos tarda pa reconcilia, mas atras nos ta bay den nos salud mental. Y nos por yega na haci daño na nos curpa, pasobra nos mente no ta diseña pa carga rabia, odio y amargura. Palabra di Dios ta bisa pa nos no laga solo baha riba nos rabia, no duna diabel oportunidad.

Nos mester pone tur mentira un banda y cada un di nos papia berdad cu otro, pasobra nos ta miembro un di otro.

Hopi palabra ofensivo ta afecta salud mental di un persona.

No laga palabra dañino sali fo’i boso boca, sino solamente pa edificacion, conforme e necesidad di e momento, p’esaki por duna gracia na esun cu ta tende. (Efesios capitulo 4:22 -32)

Laga tur amargura, furia, rabia, gritamento y calumnia ta kita fo’i boso, hunto cu tur malicia. Y sea cariñoso cu otro, misericordioso, pordonando otro, mescos cu Dios den Cristo tambe a pordona boso.

Dicon Dios no ta pordona un persona cu no ta pordona su prohimo? (Mateo Capitulo 6:14 y 15).

Pasobra e persona ey ta haci manera nunca e a haci algo robes, pasobra nos tur a peca. Si nos bisa nos no tin pica, nos ta haci Dios un gañado y su Palabra no ta den nos. (1 Juan Capitulo 1:10)

Si nos confesa nos pica, Dios ta fiel y husto pa pordona nos picanan y limpia nos di tur inhusticia.

Y aki nan e secreto pa nos salud mental ta sinta, ora cu nos ta arepenti y ora nos ta pordona otro sin ningun clase di excuus.

Arepentimento ta bin prome cu cualkier terapia, purba cu Cristo Hesus. Pasobra tur cos ta posibel pa esun cu ta kere den Su nomber.

E ta kita tur tipo di cansancio, stress y depresion (Mateo 11:28).  

Kico ta pasa ora nos no ta pordona?

2 Corintio Capitulo 2:10 y 11 ta bisa: “Pa satanas no coy bentaha riba nos, pasobra su trikinan no ta desconoci pa nos.

Bentaha di e enemigo ta: Ora nos no ta pordona ta un porta a habri pa nos salud mental ta ataca.  

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.