fbpx
October 24, 2021

A corta presupuesto di Gateway 2030 cu 110 miyon dollar!

Share on facebook
Share on Facebook
Share on whatsapp
Share on Whatsapp
0
0
A corta presupuesto di Gateway 2030 cu 110 miyon dollar!
A corta presupuesto di Gateway 2030 cu 110 miyon dollar!


Minister di Turismo, Dangui Oduber, bou invitacion di CEO di Aruba Airport Authority, Joost Meijs, a bishita Aeropuerto Internacional Reina Beatrix awe pa mira e avancenan na e proyecto “Gateway 2030”. E bishita ta en conexion cu finalisacion di e fase 1A di e proyecto di expansion di nos aeropuerto.

Gateway 2030 ta un proyecto di mas di 140 miyon dollar cu lo genera entre 200 y 300 cupo di trabou sea directo of indirecto cu Aruba Airport Authority. E proyecto aki lo crea un spin off economico pa pais Aruba y lo trece placa den caha di Gobierno a traves di impuesto. Ta un proyecto importante pa e ampliacion y renobacion di nos aeropuerto.

Minister di turismo y Aeropuerto ta amplia mas riba proyecto Gateway 2030

Minister di turismo y Aeropuerto Reina Beatrix ta amplia mas riba proyecto Gateway 2030

Posted by 24ora on Wednesday, October 13, 2021

Minister Dangui Oduber a duna di conoce tambe cu inicialmente e proyecto di Gateway 2030 tabata tin un inversion di 250 miyon dollar. Esaki naturalmente tabata prome cu e pandemia. E pandemia a cambia henter a panorama di e proyecto y awor e tin un inversion di 140 miyon dollar. Minister a splica cu mester a reprograma henter e proyecto y asina pone e proyecto den diferente fase. Esaki no ta un proyecto facil, e tin hopi complexidad cu ne mirando cu e ta na un aeropuerto cu mester keda operacional na tur momento, e mandatario ta expresa.

Minister Oduber a sigura cu contratistanan local lo ehecuta e proyecto aki y cu ta cumpra mayoria di e materialnan di construccion na Aruba mes. Segun planificacion, lo mester entrega e proyecto aki na aña 2024, asina e madatario a trece dilanti.

Minister Dangui Oduber a splica den e conferencia di prensa cu fase 1A ta encera un expansion di e US departure hall. Esaki lo bira dos biaha mas grandi cu locual e ta na e momento aki. Tambe lo construi un “baggage hall” completamente nobo, uzando tecnologia ultra moderno y masha sofistica!

Segun e mandatario, esaki lo ta un di e miho “baggage hall” nan na mundo y sigur e miho den Caribe na momento cu e ta den funcion. Minister Dangui Oduber a menciona cu e ta un inversion basta cuantioso pero na momento cu e ta cla, nos aeropuerto lo por ofrece un miho servicio y experencia na nos bishitantenan.

Joost Meijs ta CEO di Aruba Airport Authority desde 2019. El a cuminsa traha cu Eindhoven Airport NV desde 2006 y na 2008 a bira CEO eynan. Esey ta di dos aeropuerto di Hulanda, cu ta maneha 5.7 miyon pasahero pa aña. Esey ta dobel di Aruba, cu na 2019 a maneha 2.53 miyon pasahero, pero hopi menos cu Schiphol cu ta maneha 72 miyon pasahero pa aña. Riba e foto di awe por mir’e sinta banda di Minister di Turismo y Salud Publico, Dangui Oduber, den su di dos termino den funcion di Minister di Turismo.

Minister Dangui Oduber a splica cu e inversion aki ta necesario, mirando e proyeccionnan cu tin pa futuro. Ta proyecta cu Aruba lo sigui crece den cantidad di bishitante y si no haci e inversionnan awo, nos aeropuerto no por bay duna e servicio na nos bishitantenan cu nos ta desea.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.