fbpx
October 24, 2021

Aruba no tin ekipo special pa move avion cu a accidenta riba pista

Share on facebook
Share on Facebook
Share on whatsapp
Share on Whatsapp
0
0
Aruba no tin ekipo special pa move avion cu a accidenta riba pista
Aruba no tin ekipo special pa move avion cu a accidenta riba pista


Tin un avion riba pista di aeropuerto, daña desde siman pasa. “Unda cu e ta para e no ta stroba operacion di aeropuerto completamente, pero eynan e no por keda si”, asina director di Aruba Airport Authority N.V, Joost Meijs, a contesta awe riba nos pregunta di con ta haci cu e avion awo.

Diabierna ultimo dia 8 di october pa mas of menos 6:00 pm a bati alarma na aeropuerto pa un avion cu a accidenta riba pista. Ta trata aki di un avion cu tin mas di un aña na Aruba “grounded” door di autoridad di aviacion civil. Parce cu e “landing gear” banda robes di e avion matricula N103VV a faya. Consecuencia di esaki ta cu e avion a ricibi daño n’e hala banda robes y tambe a kibra pida di e asfalt di e rampa. E hero di e landing gear a bora e rampa un poco.

No kier uza grua

Awor ta pensa pa uza un grua pa move e avion pero e pilotonan no kier, nan ta prefera pa uza ekiponan special di afo (material yena cu aire pa evita mas daño). E pilotonan tin miedo cu si uza un grua, por causa cu e banda drechi dal abou causando mas daño. No ta conoci con lo haci pa saca e fuel fo’i e banda robes.

Aruba no tin ekipo special pa move avion cu a accidenta riba pista

Aruba no tin ekipo special pa move avion cu a accidenta riba pista

Posted by 24ora on Wednesday, October 13, 2021

Avion tabata geground

E avion N103VV, un Golfstream 5, no ta desconoci na Aruba, pasobra na februari 2020 e tabata den noticia pa supuesto bara di oro, cual despues a resulta di no ta berdad. Loke si ta berdad ta cu, tabatin 12 pasahero abordo na momento cu el a yega Aruba for di Mexico. Algun di e pasaheronan tabatin varios mil dollar, nada cu a surpasa e suma permiti pa ley. E problema cu e avion aki tabata cu e no tabatin su documentonan na ordo y a ‘ground’ e. E avion a keda para na aeropuerto, wardando p’e cambio di registracion Mexicano pa un Mericano.

E avion ta relativamente nobo

A traha e avion aki na aña 2016 y e prome doño tabata Sano Aviation Group. Cuater aña despues, na final di september 2020 a bend’e cu Aircraft Holding Solutions LLC, cu su base na Newark, na Merca. E avion ta di modelo 1982 Golfstream Aerospace G-1159A. E tin 21 asiento den dje y tin dos motor turbo-jet di marca Rolls-Royce. Su registracion cu Federal Aviation Administration (FFA) di Merca ta vence te cu dia 30 di september 2023.

Por sigui opera normal ainda

Director di Aruba Airport Authority N.V, Joost Meijs, a subraya awe cu nan ta bezig cu doñonan di e avion pa asina por yega na un solucion mas pronto posibel pa e problema aki. Si el a bisa cu e avion, unda cu e ta actualmente para no ta stroba operacion di Aeropuerto Internacional Reina Beatrix. E ta para riba su pianan, no riba wiel y aeropuerto mes no tin e makinaria necesario pa lant’e for di eynan, pa cual mester manda busca esaki di exterior.

Ken ta cubri e gastonan?

Joost Meijs a bisa tambe cu e accidente aki a ocasiona daño na e pista y esaki tambe ta un punto di discusion entre Aruba Airport Authority y e doñonan di e avion. Ta deliberando cu nan riba nan responsabilidad pa cu e gastonan. Mester lanta e avion c’un makinaria special lo mas pronto posibel, cu no ta obtenibel aki na Aruba, pues e mester bin di afo, cu tur e gastonan adicional cu e transporte y huur di e aparato lo trece cu ne. Aeropuerto en todo caso no tin pensa di cubri e gasto aki!

No tin deadline pero mester move pa caba si

Riba tereno operacional, e avion no ta stroba, pero si Joost Meijs a enfatisa cu e no por keda riba pista pa tempo indefini tampoco. Trafico aereo ta sigui opera normal. Pero si mester yega na un acuerdo satisfactorio pa ambos partido pa cu e avion aki. E director no kier a menciona un fecha ainda, pero el a haci un apelacion riba e compania pa move nan avion lihe. De lo contrario por sosode cu aeropuerto mes ta move, cubri e gastonan y pone e compania doño di e avion responsabel pa e gastonan adicional. Un di e avionnan asina nobo, ta costa mas of menos 40 miyon dollar, pues e chens cu e doño no lo paga pa drech’e ta minimo.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.