fbpx
October 24, 2021

Pueblo ta opina riba multa di dies florin di WEB

Share on facebook
Share on Facebook
Share on whatsapp
Share on Whatsapp
0
0
Pueblo ta opina riba multa di dies florin di WEB
Pueblo ta opina riba multa di dies florin di WEB


Mientras cu ainda e situacion ta dificil, WEB Aruba NV a informa cu lo reintroduci e multa di dies florin (Afl. 10,=) na momento cu un cliente no cumpli cu su pago na tempo. Manera ta conoci, mensualmente WEB ta saca su cobransa pa uzo di awa, tanto domestico como comercial y ta stipula un ultimo fecha di pago. E motibo di esaki ta pa encurasha clientenan pa cumpli cu nan pago den e tempo stipula.

Na otro banda, WEB tambe tin un cantidad di compromisonan, entre otro cu banconan y su creditornan, pa cual e mester por conta riba entrada fiho tur luna y na tempo. Door di e mal custumber di paga laat, a introduci un multa di 10 florin riba cada recibo cu e cliente paga laat. Hasta a splica cu ora haci transferencia via banco, cu mester manda prueba di ki dia a paga pa evita cu e suma ta subi e cuenta di WEB laat of desues di e ultimo dia di pago.

Durante pandemia, clientenan a haya nan mes man mara y cu hopi reto financiero. Un cantidad di cliente, cu tradicionalmente ta bon pagado, a haya nan pega pa cumpli cu e pago durante e tempo stipula. Negoshinan tabatin problema pa paga salario na tempo, pues e trahadonan ta haya nan cu e reto pa cumpli cu nan debenan tambe. Otronan a realisa cu nan doño di trabou a baha nan salario ten a 60% pa luna, mientras cu nan gastonan taata fiho.

Cu e realidad aki riba mesa, WEB a opta pa di su banda, ofrece un ayudo na su clientenan. A elimina e multa ora di paga laat pa duna un man y pa no haci e peso mas pisa riba e clientenan cu tabata “struggle” cu nan debenan di tur luna. Pero, mirando cu e situacion economico ta drechando y cu mayoria negoshi ta yegando nan entrada normal y trahadonan a cuminsa cobra normal of casi henter nan salario compara cu prome cu e pandemia, a opta pa reintroduci e multa desde dia 1 di januari 2022.

Consecuentemente nos a acerca algun cliente pa puntra nan opinion tocante e multa cu lo mester paga entrante 2022.
E opinion tabata mixto den comunidad, mirando cu ainda e situacion no ta manera custumber, ni na e manera normal di custumber, cu tur hende ta cobra manera mester ta. Tin hende ta cobra laat of no riba e fecha di custumber of prome cu e fecha cu tin riba e recibo cu ta indica cu e recibo ta vence. Esaki lo bira un presion riba esunnan cu no tin un entrada stabiel y of fiho.

WEB ta cla pa cobra mas placa, pero algun cliente a sigura cu kier cobra placa cu nan no tin. Algun a remarca cu esaki no ta un manera pa yuda e pueblo, cu ainda no tin e stabilidad financiero.

Pero mescos cu tin e grupo contra reintroduccion di e multa, asina tin un grupo cu ta completamente na fabor! E grupo specifico ey a menciona cu mester cumpli y cu e recibo ta indica claramente e ultimo dia di pago. Ta sinti cu ciudadanonan mester bira mas consciente tambe cu nan debenan di tur luna. No por ta asina cu tanten cu e companianan di utilidad no corta suministro, cu ta e ora ey ta core bay paga. Mester tin un disciplina propio pa cumpli tur luna sagradamente, sin cu mester duna multa ni nada. Si tur hende paga nan debenan ora cu nan kier, anto e ora ey e negoshinan en cuestion tambe lo bay bancarota pa falta di entrada sigura y na tempo.

Pesey, e unico opcion awo ta pa manera bo cobra, paga bo cuenta pa bo scapa pago di multa di dies florin. Tin usuario ta corda ainda cu e multa tabat’ey semper, e mihor cos ta pa evita paga laat. E manera pa evita e multa di dies florin, ta pa paga bo cuenta na tempo!

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.