fbpx
October 24, 2021

Restauracion di Ex Botica Aruba a finalisa

Share on facebook
Share on Facebook
Share on whatsapp
Share on Whatsapp
0
0
Restauracion di Ex Botica Aruba a finalisa
Restauracion di Ex Botica Aruba a finalisa


Den presencia di Minister di Cultura, Stichting Monumentenfonds Aruba (SMFA) a celebra e finalisacion di e proyecto di restauracion di e monumento na Steenweg 19 conoci manera ex Botica Aruba of El Mercado.

SMFA sigur kier agradece tur cu a traha na e proyecto aki di un of otro forma.
E proyecto a keda ehecuta p’e contartista Van Kessel Havenbouw NV. E diseño di e edificio tabata den man di Archiosa y Archiosa hunto cu JOOST ABC tabata encarga cu e supervision di e proyecto. Tambe nos ta gradeci sr. Evert Bongers cu a haci e investigacion di e historia di e bunita monumento aki y a skiribi e articulo: Botica Aruba, bedrijf van heren van stand. Sigur un danki na tur e familiarnan cu a yuda tambe cu informacion y fotografianan di antes pa asina nos por a logra e proyecto aki. Por ultimo tambe un danki na Walter Mohammed nos boluntario cu a fotografia e edificio pa nos durante diferente fase di e proyecto.

Den e caso di Steenweg 19 a restaura solamente e parti exterior di e monumento. E motibo pa cu esaki ta cu ainda no tin un huurdo pa e edificio. Una bes cu Stichting Monumentenfonds Aruba logra cera un acuerdo di huur lo cuminsa cu e di dos fase pa asina adapta e interior di e edificio na necesidad di e usuario.

Generalmente prome cu haci compra di un edificio tin algun rekisisto cu SMFA ta exigi pa por cumpra e edificio, un di nan hopi importante ta cu mester tin un huurdo na termino largo pa por sigui cu e proceso pa adkeri e monumento.
Den e caso di e edificio monumental aki na Steenweg na momento di compra no tabata tin un huurdo pero debi na e circunstancianan y cu e edificio lo a core peliger di cay den man di comerciantenan cu lo a basha esaki abou, SMFA a tuma e decision di cumpra pa asina por salba esaki.

E edificio na Steenweg 19 ta un monumento proteha, construi na 1925 pa Addison Winfield Croes. Na aña 1935 hunto cu Gustave Nouel a cuminsa cu Botica Aruba den e edificio y esaki a fungi como botica te na November di aña 1985 caminda cu lamemtablemente e botica mester a cera su portanan. Despues Palais Hindu a cumpra e edificio y na aña 1993 ‘El Mercado’ a habri su portanan.

Awor despues di seis aña cu SMFA a adkiri e edificio, nos ta sumamente orguyoso di por a restaura e edificio aki y hibe bek na su forma original den cual e la keda construi den añanan binti. Un monumento cu hopi detaye y decoracion. Nos a logra restaura tur esakinan, habri e balcon di e edificio bek y trece bek e decoracionnan den estilo ‘gingerbread’ tanto na e bentananan como na e balcon. Den e forma aki Stichting Monumentenfonds Aruba por garantisa cu e monumento di Steenweg lo tey pa futuro generacionnan por conoce tambe e historia di Botica Aruba.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.