fbpx
November 30, 2021

Pastoor Marcel Balootje: No adora placa

Share on facebook
Share on Facebook
Share on whatsapp
Share on Whatsapp
0
0
Pastoor Marcel Balootje: No adora placa
Pastoor Marcel Balootje: No adora placa


Placa ta necesario den tur cas di famia. Nos mester come, bisti, cumpli cu pago di utilidad, etc.

Pero e amor pa placa ta reis di tur maldad, pasobra ora nos ta stima placa mas cu hende, nos ta coy un direccion den nos bida, cual por hiba nos den hopi scuridad.

Si nos wak con tin hoben ta tira otro mata pa placa, no ta importa e cantidad. Nan no ta respeta bida di otro, pasobra e placa ta mas importante.

2 Timoteo capitulo 3:1-9 ta splica nos, cu den e tempo aki hende lo bira stimado di nan mes y stimado di placa. Esey ta nifica cu hende ta capaz di haci tur sorto di bagamunderia y maldad basta nan haya placa.

Cuanto bida no ta kibra, pasobra tur cos tabata bay bon, te ora amor pa placa a lanta y hende ta lubida cu nan tin yiu y ta kibra bida y bay caminda tin mas placa, sin ningun clase di berguensa y temor di Dios.

Hebreunan Capitulo 13:5 ta bisa lo siguiente: “Laga boso caracter ta liber di amor pa placa y sea contento  cu loke boso tin.” Pasobra E mes a bisa: “Nunca lo Mi bandona bo y nunca lo Mi laga bo desampara.”

Asina cu nos por bisa cu tur confiansa, Señor ta mi yudado, mi no tin miedo. Kico hende por haci mi.

Den Filipensenan capitulo 4:11 Pablo ta bisa: “No cu mi ta papia pasobra mi tin necesidad, pasobra mi a siña di ta contento den ki circunstancia cu mi haya mi aden.”

Circunstancia rond mundo no ta bon pero esey no ta nifica cu hende mester cuminsa biba bida inmoral pa asina nos yega na placa.

Y como mayor nos mester tene cuenta pa amor pa placa no cuminsa domina bida di mucha for di chikito, caminda bo ta haya un ruman ta cobra otro den cas y hasta bringa cu otro pa motibo di placa.

Ora cu mucha ta actua asina fo’i chikito esey no ta nifica inteligencia. Pero esey ta nifica cu nan amor pa placa ta asina grandi cu ora nan crece, nan lo hiba nan propio ruman dilanti di hues pa placa.

Un bendedo di droga sa cu locual e ta bende por causa morto of destruccion mental. Pero pa amor pa placa e ta hacie.

Un atracado sa cu amor pa placa por ta causante di hopi aña  den prison, pero toch e ta atraca.

Un hende cu ta gusta wega di placa sa masha bon cu su famia ta ward’e na  cas pero pa amor pa placa e ta pone placa di cuminda riba mesa di wega.

N’e momento cu nos muri, nos no ta bay cu nada y tampoco nos lo sa ken lo bay gasta locual cu nos a laga atras. Awo pakico, rabia, pleita y venga otro pa placa.

Dios tene misericordia, pa asina hende por pone nan bista riba Dios y huy fo’i amor pa placa.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.