fbpx
November 28, 2021

Disgusto: Trahadonan di Wit Gele Kruis no a cobra

Share on facebook
Share on Facebook
Share on whatsapp
Share on Whatsapp
0
0
Disgusto: Trahadonan di Wit Gele Kruis no a cobra
Disgusto: Trahadonan di Wit Gele Kruis no a cobra


Mientras cu Gobierno di Aruba a paga su trahadonan caba, por lo menos trahadonan di un fundacion, esta Wit Gele Kruis, no a logra cobra nan salario ainda. Directiva di e fundacion, di forma habri, a bisa nan empleadonan cu gobierno no a traspasa e placa di tur luna ainda. Parce cu gobierno tin problema di likidez, cu consecuencia cu fundacionnan a haya nan ta “core cabes di gay” pa cera nan payroll. E trahadonan sinembargo ta lamenta cu mayoria otro fundacion si a cobra, pero nan nada ainda.

Ta trata aki di casi 100 trahado cu awo a keda sin salario. Nan a custuma di cobra mesun dia cu ambtenaarnan, esta 22 of 23 di luna. Awo cu fin di aña ta acercando, cu tur e gastonan cu ta bin adicional, nan ningun a pensa cu net awo gobierno ta bay keda sin paga nan salario y lagando nan den un incertidumbre y panico financiero. Net nan tin un trabou escencial den henter e pandemia aki, bayendo cas pa cas pa cuida baby y nos grandinan.

E ultimo añanan e mesun Wit Gele Kruis a tuma e trabou di e assistentnan di dokter tambe over, conoci como e Praktijkondersteuner Huisartsenzorg (POH). E nursenan specialisa pa por brinda sosten na e dokternan di cas, specialmente den brinda cuido profesional na pashentnan cu enfermedadnan cronico, tambe ta traha bou di Wit Gele Kruis Aruba. For di otro instancia ta pasa e placa riba nan cuenta, cu na nan turno ta paga e POH’s nan un salario mensual prome cu fin di luna.

For di por lo menos un sindicato grandi cu ta representa empleadonan publico, a confirma cu mas fundacion a haya nan mes cu problema door cu gobierno ta laat cu nan pagonan. Ey tambe a bin e mesun hustificacion, esta cu gobierno no tin placa. Sinembargo, departamento di finansa di gobierno a sigura na e fundacionnan cu nan lo keda cla prome cu fin di siman, pues na tempo ainda pa por cubri salarionan. Algun di e fundacionnan aki, cu tin placa gespaar, a opta pa “schiet voor” e payroll na trahadonan wardando riba e transferencia di gobierno.

Gino Goeloe, presidente di Wit Gele Kruis a confirma cu berdad nan a bin haya nan mes den un situacion precario door cu e subsidio mensual di Gobierno di Aruba no a drenta e luna aki. Di otro banda, el a haya confirmacion cu pa diahuebs mainta e placa lo pasa riba nan cuenta y mesora lo procesa pago na nan trahadonan. Aunke e tin comprension pa e hecho cu a custuma cu ta cobra hunto cu gobierno, toch di otro banda el a corda su empleadonan cu ainda no ta fin di luna. Pa diahuebs atardi e ta spera di a logra transferi salario di tur empleado.

Wit Gele Kruis ta un fundacion cu ta traha pa mas di 40 aña na bienestar di e comunidad di Aruba. Nan meta principal ta pa promove, activa y optimalisa cuido di salud den e comunidad Rubiano. Wit Gele Kruis ta enfoca riba cuido na cas, cuido pa mayor y yiu, informacion di nutricion, informacion di diabetes, control di sucu, presion, colesterol y trygliceride den diferente districto. Tambe nan ta ofrece servicio di rolstoel. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.