fbpx
November 28, 2021

Minister Xiomara Maduro: Status Aparte a brinda nos un Pais, ta keda na nos pa construi Patria

Share on facebook
Share on Facebook
Share on whatsapp
Share on Whatsapp
0
0
Minister Xiomara Maduro: Status Aparte a brinda nos un Pais, ta keda na nos pa construi Patria
Minister Xiomara Maduro: Status Aparte a brinda nos un Pais, ta keda na nos pa construi Patria


Diamars ultimo Minister Maduro di Cultura hunto cu Minister President Evelyn Wever-Croes tabata anfitrion di e ‘Conferencia 35 aña Status Aparte, Aruba ta di nos tur’,  dedica pa conmemora e 35 aña di Aruba como Pais autonomo denter di Reino Hulandes.

Tabata un mainta yena cu e historia di e Status Aparte di nos Pais y su protagonistanan. Un mainta na unda cu grandi y hoben por medio di entrevista a haya oportunidad pa expresa nan opinion riba Aruba su Status Aparte y con nan ta wak Aruba den futuro. Panelistanan consistiendo di profesionalnan di Aruba a duna un bista di con nan a experencia nos Status Aparte, con nan ta wak cu Aruba a desaroya den 35 aña di tempo y con nos Pais lo mester sigui desaroya e siguiente añanan nos dilanti.

E ‘Conferencia 35 aña Status Aparte, Aruba ta di nos tur’, tabata yena di e creatividad di nos hendenan. Por medio di un visualisacion a conta e historia di Status Aparte y e desaroyo di Aruba den 35 aña. Tambe tabatin declamacion di e poema ‘Union …. E yabi’ door di  sra. Melendy Bisslik – Neuman, ganadora di Poeta di Patria 2018 y 2019.  Alabes tabatin presentacion di un obra teatral ‘Curason- Aruba ta di nos tur’ cu actuacion di sr. Jhon Freddy Montoya y sra. Joan Danies, acompaña pa musiconan sr. Johnny Scharbaay y sr. Chencho Kelly como aporte di Departamento di Cultura.

Durante e Conferencia aki tambe a presenta dos panel ‘Posicion di Aruba den Reino’ lidera pa moderador sra. Indra Zaandam cu panelistanan sra. Lily Marval, sr. Aldrich Croes, sr. Tristan Every, sr. Rendell de Kort, sr. Edric Croes y sr. Hubert Dirks. Durante e panel e panelistanan a comparti nan opinion riba varios tereno kico Status Aparte a nifica pa Pais Aruba y tambe con nan ta mira Aruba su futuro den Reino.

E conferencia a clausura cu e interpretacion di e cantica ‘Mi Pais’ di nos artista Jossy Brokke hunto cu Edjean Semeleer, acompaña pa e guitarista Chris Kross. Un bunita cancion pa recorda nos riba e stimacion cu nos mester tin den nos curason pa nos Pais. Status Aparte a brinda nos un Pais, ma ta keda na nos pa construi Patria.

Minister di Finansa y Cultura ta yama danki na tur e panelistanan, na e personanan cu a comparti nan opinion tocante Status Aparte den e grabacion, sra. Clarita Britten, e hoben Jaylon Machado, High Performance, TeleAruba, Diario TV, Canal 22, Radio Power FM y tur otro medionan social,  pa nan tremendo cooperacion. Alabes Minister Maduro ta gradici tur hende cu a acepta e invitacion pa tabata parti di e conferencia den un ambiente positivo y cu e mensahe principal di union na bienestar di Aruba.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.