fbpx
November 28, 2021

Alice van Romondt a tuma despedida di Prins Bernhard Cultuurfonds Caribisch Gebied

Share on facebook
Share on Facebook
Share on whatsapp
Share on Whatsapp
0
0
Alice van Romondt a tuma despedida di Prins Bernhard Cultuurfonds Caribisch Gebied
Alice van Romondt a tuma despedida di Prins Bernhard Cultuurfonds Caribisch Gebied


E oficina di Prins Bernhard Cultuurfonds Caribisch Gebied a organisa tres dia di evento tras di otro, pa por tuma despedida di Alice van Romondt, kende despues di 37 aña, ta tuma despedida di e organisacion. Ta casi 40 aña di hopi reunion intensivo y emocionante, tur na bienestar di cultura di nos islanan. E ultimo funcion den e organisacion ta esun di vice-presidente.

Alice van Romondt no ta un persona desconoci den comunidad. E bibliotecaria a dedica gran parti di su bida manehando Biblioteca Nacional di Aruba y despues na dos ocasion a fungi como Secretario di Conseho di Minister di nos pais. E ta un bon conocedo di nos literatura y cultura di nos isla. Es mas, bou su insistencia, tres aña pasa a logra crea Fondo Eduardo de Veer cu ta resorta bou di Prins Bernhard Cultuurfonds. Nan meta ta pa subsidia esfuersonan y proyectonan di cultura, musica pero enfoca riba piano y violin. E fondo a subsidia diferente proyecto caba, entre otro un Pianolab.

Siman pasa a tene un nochi cultural hopi exclusivo y impactante cu un cena na Catedral di Sumpiña na Corsou. Mientras cu e directiva tabata saboreando nan cena, Garrick Marchena tabata pinta un shoco gigantesco riba escenario.

Mester agrega cu como muestra di gratitud pa e trabounan cuantioso y valioso desplega, directiva a nombra Alice van Romondt como e prome miembro honorario di Prins Bernhard Cultuurfonds.

Crisen Corea, un culturista di Corsou, cu tin su propio orkesta, a declama un poesia na honor di Alice van Romondt. Eyden e ta describi exactamente e locual cu Alice ta den bida real. Tabata un momento masha emocional ora el a trece e declamacion aki padilanti, den presencia di van Romondt y su casa Roly Sint Jago. Demas miembronan di e fondo na Aruba ta Des Croes, Renwick Heronimo, Rafy Kock y Eduard Erasmus.

Ta bon pa menciona cu e trabounan duro di Alice van Romondt den e organisacion, no a bay sin un homenage. Asina tres aña pasa, na mei 2018, el a bira e prome hende muhe di Aruba pa ricibi e distincion “Zilveren Anjer” for di man di Su Altesa Real Prinses Beatrix, den e Palacio Real na Amsterdam. Alice van Romondt a ricibi su Zilveren Anjer pa su contribucion na cultura, literatura y arte na Aruba. Ta otorga e Zilveren Anjer desde aña 1950 na personanan cu a base boluntario y sin fin di lucro ta aporta na cultura of naturalesa dentro di Reino Hulandes.

Prins Bernhard Cultuurfonds Caribisch Gebied ta existi pa mas di 80 aña caba. Es mas, aña pasa, na ocasion di celebracion di nan 80 aniversario na Hulanda, a haci un donacion adicional na e hala den Caribe Hulandes di no menos cu 80 mil Euro, pues algo mas cu 175 mil florin. Anualmente e organisacion ta subsidia mas di 170 proyecto di particularnan y di demas fundacionnan na e islanan den Caribe Hulandes. Aunke ta papia di cultura, e fondo ta haci distincion den diferente tereno di trabou, dunando e palabra cultura un dimension y envergadura masha amplio.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.