FALCON – Familiarnan di dos persona Venezolano perdi, a keda alerta diahuebs ora cu a haya un curpa sin bida na un boca na Aruba. No ta descarca cu e curpa ya den estado di descomposicion por ta un di nan. Segun e portal Venezolano El Pitazo, aunke cu no a identifica e curpa di e persona, e famianan a cuminsa mobilisa pa wak kico ta kico.
ESNAN DESAPARECI
Un di esnan desapareci ta Ángel Antonio Primera, (50) di estado Falcon. Hunto cu un grupo di otro persona, el a Sali di e peninsula di Paraguana dia 20 di November cu intencion di yega Aruba, pero a keda raporta como perdi. Su mayornan a wordo informa cu e barco cu e tabata ariba a wordo ‘golpea’ pa un ola y cu esaki a hundi. Ocho di e 9 pasaheronan a yega tera firme, pero Primera no a yega. E otro desapareci a keda señala como Carlos Capino Sánchez, (39), un barbero di profesion cu tabata residencia na e municipio Los Teques, estado Miranda. Capino a sali rumbo pa Aruba dia 24 di November, pagando 600 dollar pa su biahe clandestino, segun su amigonan a bisa. Hunto cu Capino, tabatin por lo menos 25, di cual 1 Capino no a logra yega. Segun testigos, e boto, a laga e grupo 600 meter di costa di Aruba, cu a pone cu mester a landa den e olanan fuerte pa yega Aruba. Ta bisa cu Capino no a wanta y a hoga, segun su prima Maria Sanchs a bisa e portal.