fbpx
May 28, 2022

ACCION 21: Gobierno Mericano a para sosten pa proyectonan di gas

Share on facebook
Share on Facebook
Share on whatsapp
Share on Whatsapp
0
0
ACCION 21: Gobierno Mericano a para sosten pa proyectonan di gas
ACCION 21: Gobierno Mericano a para sosten pa proyectonan di gas


Partido Accion 21 a tuma nota cu diabierna 10 di december 2021 e administracion Biden a blokea sosten financiero y diplomatico pa proyectonan nobo di ‘fossil fuels’ incluyendo LNG. E paro inmediato di sosten federal pa proyectonan cu ta produci hopi carbon manera plantanan di gas ta representa un cambio di polisa. Motivacion tras di e cambio ta pa combati cambio climatico y acelera energia renoba rond mundo.

E maneho, prome raporta pa Bloomberg diabierna ultimo, ta historico y pa prome biaha Merca ta prohibi sosten di gobierno incluyendo biyones den financiamento y subsidio como tambe ayudo diplomatico y asistencia tecnico. A comunica e noticia den fin di siman a traves di un relato pa Embahada y Consuladonan.

Aunke e maneho tin algun excepcion, Bloomberg ta raporta cu e cambio den polisa internacional Americano lo por afecta cierto proyectonan incluyendo terminalnan den Caribe pa ricibi gas LNG desde Merca. Di awor en adelante gobierno Americano lo promove energia limpi, avansa tecnologianan innovativo y provee asistencia financiero y tecnico pa apoya transicionnan net-zero rond mundo. Esaki ta exactamente e direccion den cual Aruba tambe mester bay, no compromete nos futuro cu tecnologia di pasado pa proximo 20 aña.

Ambientalistanan a motiva President Biden pa haci dicho cambio, argumentando cu construccion di pipelinenan nobo, terminalnan di LNG nobo y proyectonan similar no ta consistente cu esfuersonan pa limita aumento global den temperatura te cu 1.5 grado Celsius, asina evita e consecuencia mas catastrofico di cambio climatico.

E ultimo desaroyonan di Gobierno Mericano ta mas confirmacion ainda cu e deal cera entre WEB y Eagle LNG ta un catastrofe pa Aruba. No ta ningun coincidencia cu e firmamento ceremonial a tuma luga diahuebs pasobra for di diabierna en adelante ya no lo tabata posibel pa Consul Americano asisti bao di e maneho nobo. Ta un berguensa con Gabinete Wever-Croes II ta sigui manipula y gaña pueblo cu asistencia di nan medionan cumpra.

Dialuna den Parlamento e fraccion di ACCION 21 lo sigui ilustra e iresponsabilidad di e acuerdo firma condenando nos pais pa 20 aña den futuro. Prijsnan di gas a fluctua enormemente e ultimo aña, awor te hasta gobierno Mericano ta tuma distancia di e industria y na Aruba gobierno kier purba bend’e como algo bon pa nos pais.

“Dia 2 di november 2021 mi a manda pregunta pa Ministro di Integridad, Ursell Arends, tocante e nombramento di e director nobo di Utilities y te ainda ningun contesta. Dia 5 di november mi a manda pregunta pa Ministro Arends tocante e directiva nobo di Fundacion Lotto pa Deporte y te ainda ningun contesta. Dia 5 di november mi a manda pregunta pa Prome Ministro tocante e acuerdo cu Bohama riba e edificio bieu di Duana y te ainda ningun contesta”, asina parlamentario Miguel Mansur a vocifera.

“Ta nan mes so nan ta gaña cu nan ta hibando un maneho integro. Mi ta admira cu sikiera un di e parlamentarionan di RAIZ a lanta fe soño y cuminsa bisa ta basta. Cu e tantisimo ehempelnan di accionnan desintegro pa Gabinete Wever-Croes II den unicamente e dos luna y pico cu nan a sinta, ningun hende por kere cu nan ta capaz di crea e Aruba nobo cu RAIZ a priminti. Tin varios caso di corupcion bao investigacion di ministronan di gobierno actual cu ainda no a mira luz di dia. E unico cos manteniendo e gobierno aki na bida ta miedo di bay eleccion pa e dos partnersnan di coalicion”, di acuerdo cu Miguel Mansur.

“Persisti lo resulta den e morto di RAIZ, pasobra al final nan ta complice, mi ta spera e dos parlamentarionan di dicho partido no laga nan carera politico caba na shinishi pasobra Aruba mester di boso. Nos mester hobennan cu a rechasa politica tradicional y eherece e curashi di drenta arena politico pa trece e cambionan cu nos tur ta desea pa un miho futuro. Ta tempo pa boso realisa cu e constelacion actual no tin e capacidad di cumpli cu boso principio y promesanan. Ta ora pa tuma accion, pueblo ta conta riba boso”, asina Miguel Mansur a termina bisando.

https://www.bloomberg.com/news/articles/2021-12-10/biden-halts-federal-aid-to-coal-oil-and-gas-projects-overseas

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.