ORANJESTAD – E compania EAGLE LNG mester a concedi masha hopi mes prome cu por a keda cla cu e contracto cu WEB Aruba NV. “Si, si, si” tabata e contesta di e presidente di e compania, Sean Lalani den e programa Noticiacla LIVE diamars anochi. Mientras cu e tabata bisa esey, e tabata sacudi su cabez. “Casi e siman prome cu a firma e contracto, nos tabata cla pa bandona (e mesa di negosacion)” Lalani a sigui bisa, indicando cu casi no tabatin un deal. Y esaki despues di 8 luna di negosacion intenso. Ademas, Lalani a admiti cu e tabata un negosacion hopi dificil mes. “Un di esnan mas duro cu mi tabatin” Lalani a sigui bisa. Esaki debi cu WEB tabata hopi insistente den percura pa e beneficionan tabata bon pa Aruba.
Segun Lalani, nan tabata busca e miho interes comercial pa nan compania, pero e diferencia ta cu WEB tabata busca e beneficio pa Aruba completo. Di otro banda, Lalani a bisa cu si nan no bay bon financieramente, e no ta bay logra pa Aruba tampoco. “Y esey tabata e parti di e confidencialidad, cu ta pa proteha e futuro di e compania”.
