fbpx
May 22, 2022

Mescos cu na Aruba: Awo na Hulanda tambe a descubri fraude cu prueba di vacuna

Share on facebook
Share on Facebook
Share on whatsapp
Share on Whatsapp
0
0
Mescos cu na Aruba: Awo na Hulanda tambe a descubri fraude cu prueba di vacuna
Mescos cu na Aruba: Awo na Hulanda tambe a descubri fraude cu prueba di vacuna


E siman aki polis na Hulanda a detene dos homber na Vlaardingen bou sospecho di fraude cu prueba di vacuna. Nan tabata bende prueba di vacuna falso na hende, sin cu e personanan a tuma e vacuna di berdad contra Covid-19. Por lo menos un di e sospechosonan ta traha na Gemeenschappelijke Gezondheidsdienst (GGD), asina polis a confirma. 

Polis a detene e dos sospechosonan di 28 aña di edad, despues di un tip anonimo. Hende tabata cumpra un prueba di vacunacion cerca nan pa un suma cu ta varia entre 300 pa 800 Euro.

Despues di paga e sospechosonan, nan ta hinca informacion di e personanan den e sistema di registracion di GGD (cu ta e DVG di Hulanda), sin cu e personanan mester a tuma e vacuna ningun dia. Asina e cumpradonan tabata haya un QR-Code cu nan por uza pa drenta localidadnan unda e code ey ta un obligacion.

Mescos cu na Aruba, ta resulta cu na Hulanda tambe a opta pa para contract di e trahado di GGD prome cu e termino a vence. No a duna motibo tampoco dicon a termina e contract abruptamente, prome cu a deten’e. 

A presenta e detenidonan awe diahuebs dilanti hues-comisario, cu a prolonga nan detencion. Ministerio Publico y polis ta investigando e caso aki di fraude, pa por determina cuanto hende na Hulanda ta canando rond cu un prueba falso di vacunacion. Ta importante haya sa kendenan a traha e pruebanan aki y tambe ken tur a cumpra nan! 

Na Aruba un investigacion similar a start desde october aña pasa caba, ora cu a nota iregularidad cu pruebanan di vacuna. Ministerio Publico di Aruba a duna e caso e nomber “Wanglo”. A detene dos ex-trahado di DVG dia 13 di december 2021 y a laga nan bay dia 4 di januari 2022. Parce cu ambos a coopera bon cu husticia, dunando indicacion cla kende tur ta envolvi den e fraude, con e tabata tuma luga y ken tabata cobra. Ministerio Publico di Aruba a bisa cu no por descarta cu mas detencion lo por cay den e fraude aki.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.