fbpx
July 05, 2022

Tres punto clave den prome reunion: Sosten di likides, nota di cambio COHO y recorte 12.6%

Share on facebook
Share on Facebook
Share on whatsapp
Share on Whatsapp
0
0
Tres punto clave den prome reunion: Sosten di likides, nota di cambio COHO y recorte 12.6%
Tres punto clave den prome reunion: Sosten di likides, nota di cambio COHO y recorte 12.6%


“Mi tin tur confiansa cu e ta bay ta un periodo interesante den cual nos ta bay logra cosnan grandi pa Aruba”

Dialuna 10 di januari 2022 mainta, señora Alexandra van Huffelen a huramenta como Secretario di Estado di Asuntonan di Reino. Prome Minister Evelyn Wever-Croes, den e prome reunion virtual cu señora van Huffelen, den nomber di Gobierno di Aruba, a expresa palabranan di felicitacion na e Secretario di Reino pa e siguiente periodo.

“Mi a bisa señora van Huffelen cu mi ta spera cu nos por tin un bon relacion cu otro den cual nos ta tuma cuenta cu e vision y e balornan cu nos tin en conhunto pa hunto nos por desaroya oportunidadnan nobo den Reino y pa asina pronto Aruba por ta bek para riba su propio forsa”, Prome Minister a duna di conoce.

Señora van Huffelen a mustra hopi interes pa sa con ta bayendo na Aruba en general. Prome Minister a informa señora van Huffelen di con e recuperacion economico di nos pais ta bayendo y cu danki na Hulanda nos por a enfrenta e momentonan mas dificil.

Tambe señora van Huffelen a puntra con ta para cu Covid. Prome Minister a inform’e di e  cifranan cu actualmente ta hopi halto door di Omicron dunando di conoce tambe cu te ainda por maneha e situacion pasobra nos capacidad den hospital ta bou control. Tambe Aruba ta manehando e echo cu Merca a pone nos den e categoria cu mas riesgo. Apesar di ta mira cancelacionnan, asina mes turistanan ta sigui bin y esaki ta un bon señal.

Den transcurso di dia, Prome Minister a manda un carta mas elabora pa señora van Huffelen pa duna infomacion tocante Aruba y e puntonan cu ainda tin nos dividi cu e Ministerio di Asuntonan di Reino. Di su banda, Secretario di Estado pa Asuntonan di Reino a expresa cu pronto lo ta bek na mesa pa cuminsa negocia riba e tres puntonan cu a keda habri riba 17 di december den e ultimo Conseho di Minister di Reino.

E prome di e tres puntonan aki, Prome Minister a duna di conoce, ta e echo cu Hulanda a pone como condicion pa nos haya sosten di likides pa e kwartaal aki, un protocol cu nan kier a pone sin fecha. Despues sinembargo, Hulanda mes a cambia nan posicion y bisa cu nan ta dispuesto na papia di un fecha. E di dos punto ta e nota di cambio di Consensus Rijkswet di COHO. Y e di tres punto ta e echo cu Hulanda no kier pa nos stop e recorte di salario di 12.6% di empleadonan publico y semi-publico.

“E tabata un bon reunion cu señora van Huffelen kende ta un persona cu tin hopi interes pa Aruba y pa e paisnan den Reino. Mi tin tur confiansa cu e ta bay ta un periodo interesante den cual nos ta bay logra cosnan grandi pa Aruba”, Prome Minister a duna di conoce.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.