fbpx
January 18, 2022

Ta busca Angelo Apostel pa presenta den Corte

Share on facebook
Share on Facebook
Share on whatsapp
Share on Whatsapp
0
0
Ta busca Angelo Apostel pa presenta den Corte
Ta busca Angelo Apostel pa presenta den Corte


Diahuebs merdia Corte den Prome Instancia tabatin riba rol e caso penal contra e homber Angelo Apostel. Sinembargo, mescos cu den diferente otro caso, e acusado no a presenta. Angelo Apostel ta pone riba agenda di Corte pa awe diahuebs 2:00 pm. Pero, na momento cu griffier a yama su nomber, e sala dilanti Corte tabata bashi…Apostel no tabatey.

E acusacion contra dje ta cu den e periodo di 13 di maart 2018 pa dia 1di november 2018, el a comete abuso sexual contra un persona bou di 16 aña. Hues a bisa cu normalmente e casonan ta sigui den ausencia. Sinembargo, e caso aki ta serio pa trat’e sin scucha kico e acusado tin di bisa.

A pesar cu ta trata di un caso di basta aña bieu. Mientrastanto tres aña a pasa y e victima, cu e tempo aya tabatin 15 aña, awe ta mayor di edad (18 aña). E tin un yiu tambe. Mirando cu Voogdijraad tabata envolvi y esun cu a entrega keho, tabata kier sa si ainda e instancia aki ta envolvi cu e caso y pa ki banda, e menor of e mama.

Ta bon pa menciona cu na october 2021 caba e mester a presenta na Corte y e no a haci esey. Consecuentemente a bolbe dun’e un otro citacion y a opta pa atrobe no presenta. E ta core risico cu hues ta duna ordo na polis busc’e y deten’e pa trec’e Corte pa e atende e caso penal contra dje.

Den e dossier ta para tambe cu a bay na e cas na Sero Patrishi pa entreg’e e citacion, pero a topa cu un cas bashi y bandona. Pues, e no a haya ni e citacion ainda. Niun hende no sa unda e ta biba awor. Hues a duna instruccion pa averigua cu Voogdijraad si nan sa su paradero, pero tambe cerca mama di e victima y si por haya mama di Apostel, cerca kende e acusado tabata biba, pa sa unda e ta. A pone un fecha te na fin di maart pa tratamento di e caso.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.