fbpx
June 30, 2022

Studiante di IPA a haci nan presentacion di ICT

Share on facebook
Share on Facebook
Share on whatsapp
Share on Whatsapp
0
0
Studiante di IPA a haci nan presentacion di ICT
Studiante di IPA a haci nan presentacion di ICT


Asina cu aña a habri, varios studiante ya tabata pura pa scol habri bek pa asina nan por sigui gosa di nan educacion. Asina tambe, dos studiante di IPA a conta nos di un proyecto, cu nan a prepara y ehecuta pa asina awe nan presenta dilanti nan docentenan. Jerry Diaz, studiante di primaire onderwijs klas 2 a conta cu mas cu claro tabatin poco nervio prome cu e presentacion, pero cu esaki a bay hopi bon. Asina el a sigui splica cu esaki ta prome biaha cu ta haci un proyecto asina aki na IPA, pues tabata trata di un proyecto completamente digital.

Tema cu nan a scoge pa esaki ta sigur uno cu tin hopi atencion riba dje aworaki, esta contaminacion den lama di plastic y otro articulo. Aki kier a enfoca riba mantencion di nos lamanan limpi y a dedica mas o menos tres siman trahando riba esaki. Diaz a gradici e docentenan di IPA pa e oportunidad pa realisa e proyecto aki y na su coleganan cu tambe a aporta na esaki.

Na su turno Marielle Lacle, studiante di primaire onderwijs klas 2 tambe, a conta cu e presentacion a bay hopi bon y cu e ta contento cu con esaki a bay. El a splica cu nan a dedica hopi ora pa asina por entrega un producto final di calidad y esey ta netamente locual nan a logra. Pa loke tabata nan tema, a opta pa bay cu esun di bestia y nan habitat. A realisa e proyecto aki hacienda ‘coding’, pues algo completamente nobo pa nan, pa cual nan mester a haci hopi ‘research’ pa por ehecut’e debidamente. 

Lacle a splica cu delegacion di trabou den nan grupo a bay facil y cu cada ken a sa di aporta, specialmente ora cu nan a enfrenta un cu e otro problema den e programa. A termina bisando cu nan tur ta contento cu e resultado y tambe a gradici e docentenan p’e idea di digitalisacion y mas cu claro pa e guia brinda.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.