ORANJESTAD – Otro luna Corte ta dicidi si e compania Serlimar ta keda na bida. E mandatario responsabel pa e compania aki, Ursell Arends a recorda cu den principio di februari, Corte lo mester dicidi si ta extende e periodo di surseance van betaling. Esaki ta un decision cardinal y e decision di juez lo determina destino di e compania nacional aki.
SERLIMAR NOBO
E mandatario a mustra cu mientrastanto a tuma paso pa por logra sigura continuacion di Serlimar den un ‘bachi nobo’. E mandatario asina ta sigura cu e compania tin derecho di existencia. Entre puntonan concreto tuma, ta cu a yega na areglo di pago cu departamento di impuesto na December ultimo. Ademas a logra pone e suma di 2.5 miyon riba presupuesto pa cumpli sikiera cu un parti di e debenan cu e compania tin pendiente. Ademas, a aumenta e tarifa comercial mas realistico, subiendo esaki di 25 florin pa 28 florin pa 1 container y 38 florin pa dos. E tarifanan aki ta drenta na vigor comienso di februari. Lo sigui mas paso segun e mandatrio, pa asina limita e dependencia riba gobierno.
