fbpx
May 16, 2022

Minister Geoffrey Wever: Un reflexion personal riba “Dia di Betico”

Share on facebook
Share on Facebook
Share on whatsapp
Share on Whatsapp
0
0
Minister Geoffrey Wever: Un reflexion personal riba “Dia di Betico”
Minister Geoffrey Wever: Un reflexion personal riba “Dia di Betico”


Riba Dia di Betico mi kier a comparti cu boso un reflexion personal riba e nificacion di defunto Betico Croes y tambe nificacion di e dia nacional aki pa mi. 

Mi interes den politica a cuminsa riba dia 17 di maart 1993, ora mi tabatin 12 aña di edad. Riba e dia aki a sali un articulo den Diario cu a capta mi atencion y cu tabatin un impacto grandi riba mi. E fecha exacto mi sa pasobra mi a warda e articulo cu mi ta comparti cu boso awe. Titulo di e articulo tabata 45 aña pasa ariba 18 di maart na Mesa Rondo na Den Haag, Shon A Eman a pone fundeshi legal pa e lucha di Aruba.

E contenido di e articulo y e potretnan di esnan cu a participa na conferencia di Mesa Rondo na Den Haag riba 18 di maart 1948, tabata pa mi como hoben sumamente interesante y a lanta den mi e interes den historia constitucional di Aruba. Desde e momento aki mi a cuminsa busca mas informacion over di Aruba su lucha pa Status Aparte y asina tambe mi a yega naturalmente na defunto Betico Croes.

Un poco tempo despues juffrouw Herrera di geschiedenis na Colegio Arubano a duna nos un introduccion den staatsinrichting van Aruba y siña nos tur e detayenan historico di e lucha di defunto Betico Croes pa Status Aparte, cu a duna mi ainda mas interes den conoce e historia di Betico Croes. Den mi añanan como studiante na Hulanda cu varios amigo Arubiano nos tabata wak e videonan di Betico Croes, cu tabata un inspiracion pa hopi di e conversacionnan cu nos tabatin como studiante. 

Riba “Dia di Betico” nos tur mester realiza cu e logro di Betico Croes ta un logro di un Pais completo, y ta dor cu pueblo di Aruba a uni den un causa, tras di un lider visionario, Aruba a logra bira un pais autonomo den Reino Hulandes. Awe nos mester realiza cu e tarea y responsabilidad di e generacion di politico actual ta pa restructura nos pais mas liher cu ta posibel pa asina restaura Aruba su autonomia den Reino Hulandes. Mi ta convenci cu esaki ta possibel, si cada politico y cada ciudadano di nos pais duna su contribucion. 

Mi ta spera boso a pasa un dushi Dia di Betico. 

Geoffrey Wever

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.