fbpx
October 01, 2022

Pasa bishit’e: Exposicion “Fissures” ta yegando su final

Share on Facebook
Share on Whatsapp
0
0
Pasa bishit’e: Exposicion “Fissures” ta yegando su final
Pasa bishit’e: Exposicion “Fissures” ta yegando su final


Un ultimo oportunidad pa bishita gratuitamente e exposicion “Fissures” di e artista local Belinda de Veer riba 28 di april awor di 7:00 pa 9:00 anochi na MANA (Museo Arqueologico Nacional Aruba).  Ademas di guia door di e artista y curador Renwick Heronimo lo tin canto di Angela Croes y declamacion di poesia door di Ferdinand Franca.

Durante e guia lo amplia riba e tema di e exposicion cu ta ‘catarsis’. Den psicologia esaki ta referi na  e proceso terapeutico den cua persona ta ventila y supera  su frustracionnan, emocionnan negativo y conflictonan. E resultado ta un estado di animo positivo y saludabel. E obranan di arte di Belinda ta expresion di su  ‘catharsis’ personal cu ta relaciona cu situacion dificil y doloroso cu el a confronta durante ultimo añanan. E realidad di e pandemia Covid-19 ta hasi “Fissures” actual y relevante.  E clausura ta celebra tambe cu Aruba a sa di supera e retonan cu e pandemia a presenta pa nos comunidad.

Publico por experencia e exposicion permanente di arkeologia di Aruba y e exposicion temporario “Mi bisiña tin petroglifo den su cura”, obranan inspira riba nos pinturanan riba baranca, di e artista internacionalmente renombra Sjoerd Martens.  Por admira un escultura di e artista Arubiano Osaira Muyale cu ta explora e relacion entre Aruba y Hulanda. E hardinnan y terasa di MANA, cu cada un cu su propio encanto anochi, lo ta habri p’e bishitantenan.

E clausura di e exposicion temporario “Fissures” ta anuncio di un otro proyecto grandi, esta mantencion grandi di tres monumento di Compleho Ecury. Danki na UNOCA y cooperacion di Oficina di Monumento durante e siguiente lunanan por haci trabounan necesario pa asina por acomoda exposicionnan nobo. Exposicionnan cu ta expresa desaroyo di Playa na cuminsamento di siglo 20, e nificacion di famia Ecury y balor dje habitantenan di Aruba den e epocanan pasa y actual. MANA ta sigui mehora su productonan y servicionan pa brinda su bishitantenan un experencia inolvidabel.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.