fbpx
October 01, 2022

Cual t’e prioridad mas grandi di un mayor

Share on Facebook
Share on Whatsapp
0
0
Cual t’e prioridad mas grandi di un mayor
Cual t’e prioridad mas grandi di un mayor


No ta e material, no ta e telefon caro, tampoco e carch’i banco, ni e salimento tur siman, cumpramento di paña, biahe, etc. Pero tin algo hopi importante cu tur mayor mester tene cuenta cu ne y hacie bo prioridad.

Como mayor abo t’e persona mas influyente den bida di bo yiu. P’esey hunto cu Dios, bo mester haci e miho influencia riba bida di bo yiu.

No por culpa un mayor ora un yiu ta haci cos robes pero si bo por analisa fo’i unda e influencia ta bin, for di cas, caya of mal amistad.

E influencia cu abo ta demostra bo yiu fo’i ora e ta chikito, ta crea un ambiente di bida p’e, cual e ta bay crece cu ne. Si e mucha lanta den un ambiente di influencia negativo, cual ta violencia, falta di pordon, infidelidad, mentira, bruheria, pleitamento, e influencia ey ta pega na su bida, pasobra el a lanta den dje. Awel awo nos por ripara riba un mucha su actuacion cual t’e tipo di influencia cu su mayor tin riba dje, pasobra locual mucha mira, hende grandi haci nan ta ripiti.

Si bo influencia ta positivo, anto bo yiu lo lanta cu amor. E sa con pa pordona, respeta, lubida un ofensa, e conoce balornan di bida, e ta agradecido y e gracia di Dios ta riba dje. Pasobra a influencia su caracter fo’i chikito door di su mayornan cu positivismo y asina e ta stima su prohimo y cos negativo no ta afecta e mucha.

Ta bon pa tur hende sa cu Dios ta ordena nos como mayor pa haci esey, pasobra si nos no hacie, e mundo lo hacie pa nos.

Si abo como mayor no educa, instrui, influencia bo yiu den caminda di Dios, malvado ta tuma bentaha  y daña bo yiu pa bo. (Efesios 6:4 y Josue 24:5)

Mayor mester ta masha alerta pasobra, maldad kier controla e hubentud. P’esey e instruccion di bo yiu den caminda di Dios ta bo prioridad, pasobra asina bo ta evita dolor p’e mucha como pa abo cu ta su mayor.

Laga nos wak biblicamente:

Anna a influencia Samuel (Dios a yama Samuel pa profeta)

Abraham a influencia Isaac. (Dios a bendiciona Isaac pa motibo di Abraham).

Mordecai a influencia su yiu adopta cu yama Esther. (Esther a salba su pueblo).

Eunice a influencia su yiu Timoteo (Timoteo tabata un gran evangelista).

Jochabed a influencia Moises (Moises a guia e pueblo di Israel y saca nan fo’i Egipto).

David a influencia Salomon (Salomon tabata e rey di mas sabi cu a existi).

Tur a duna bon influencia na nan yiunan y esey a resulta bendicion pa nan como pa e yiunan.

Awor den e tempo cu nos ta bibando aki:

Billy Graham y Ruth Graham a influencia nan yiu Franklin Graham pa sigui cu e ministerio y awe nos tur por mira e fruta.

Tony Evans a influencia su yiu Priscilla y nos por mira e fruta awe kico Priscilla ta haci.

John Osteen y Dolores Osteen a influencia Joel Osteen y awe nos por wak e resultado.

Bo prioridad como mayor mester ta influencia bo yiu den e caminda di Dios y asina bo ta contribui na bo pais como un bon ciudadano serio, positivo, ehemplar y Dios tambe lo ta contento cu bo. (Colosensenan 3:21) y (Proverbionan 13-20). 

Pastoor Marcel Balootje

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.