Riba e anochi di diaranson 11 di mei 2022 y diahuebs 12 di mei 2022, Recherche Samenwerkings Team (RST), bou supervision di Hues Comisario (RC), a detene tres persona y a tene tres entrada hudicial na tres cas y na adres di e dos empresanan na Sint Maarten.
E detencionnan di J.A.D., S.B.F. y N.M.B.H. y e entradanan hudicial ta relaciona c’un investigacion amplio denomina “Mitte” y ta concentra den e fraude ta relaciona cu e trabounan di limpiesa y reparacion cu a tuma luga den e Aeropuerto Internacional Prinses Juliana despues di horcan Irma. Na november 2021, e otro dos sospechosonan ya caba ta deteni den e investigacion di Mitte.
A detene J.A.D. pa soborno y labamento di placa, S.B.F. pa soborno, falsificacion y labamento di placa y por ultimo, N.M.B.H. pa labamento di placa.
Investigacion “Mitte” ta na encargo di RST bou di Team Bestrijding Ondermijning (TBO) di Procurador General di Corsou, St. Maarten, Boneiro, St. Eustatius y Saba.
TBO ta concentra riba un enfoke specialisa pa combati corupcion y delincuencia peligroso. E ekipo ta efectua e investigacionnan penal c’un componente financiero-economico y cu e implicacion di Politically Exposed Persons (PEP), funcionarionan, empresanan publico, facilitador of e organisacionnan di sector publico. Ademas di corupcion, e delincuencia transnacional hopi biaha tin di haber cu e formanan grave di fraude fiscal y labamento di placa.
