fbpx
July 06, 2022

Impacto economico di industria di Vacation Rental na Aruba balora na casi 1 biyon florin

Share on facebook
Share on Facebook
Share on whatsapp
Share on Whatsapp
0
0
Impacto economico di industria di Vacation Rental na Aruba balora na casi 1 biyon florin
Impacto economico di industria di Vacation Rental na Aruba balora na casi 1 biyon florin
Posted on 05/12/2022 2:59 pm AST | Updated on 05/12/2022 3:06 pm AST

ORANJESTAD – Diaranson ultimo a tuma luga un summit organisa pa VRPA unda cu a desvela resultado di un estudio encuanto e impacto economico y di empleo di e industria di Vacation Rental pa Aruba. E estudio aki a wordo conduci pa e compania TXP for di Austin Texas, cu ta specialisa pa conduci analisisnan economico y strategia pa cu ‘public policy’. E economista renombra internacionalmente, Jon Hockenyos a encabesa e estudio aki den luna di April 2022 y a desvela informacionnan interesante pa cu e industria di Vacation Rentals na Aruba. VRPA conhuntamente cu Aruba Tourism Authority y AHATA a financia e estudio pa asina obtene un miho bista riba e situacion actual di e industria. 

Durante e summit a pone hopi enfasis riba e balor di tin datonan pa asina por conoce mas di e potencial cu e industria aki tin pa ofrece. Ta conoci cu e industria di Vacation Rental a experencia un crecimento exponencial treciendo cambio den e industria di turismo mundialmente. Aruba como destinacion sin duda algun tambe por a nota esaki cu un crecimento remarcabel den diferente tipo di acomodacion, sea condominium, cas of apartamento. Presidente di VRPA, sr. Stuart de Vries ta splica encuanto e meta di e asociacion, cual ta pa defende y representa e mihor interes di e industria di vacation rental na un manera profesional, transparente, diligente y sostenibel. 

Pa comprende e datonan di e estudio ta importante pa remarca cu e fluho di impacto economico ta wordo determina door di e efecto directo, indirecto y e balor induci cu e ta genera. 

E estudio a revela cu e industria di Vacation Rental a recupera hopi lihe despues di e pandemia como tanto den cantidad y den prijs di acomodacion di vacation rentals. E duracion cu un bishitante ta keda den un vacation rental si a baha un poco compara cu na aña 2019 na unda un bishitante tabata keda un averahe di 6.3 dia, na aña 2021 a keda un averahe di 6 dia.

Na aña 2021 Aruba por a tuma nota di un crecimento den ingreso compara cu na 2019, cu un total di $59.8 miyon di dollar na acomodacion di Vacation Rentals. Esaki na su turno a contribui na 2021 cu un inyeccion di $248.6 miyon di dollar den economia di Aruba.

E impacto cu esaki tabata tin riba e otro sectornan ta ekivalente na 15% di Aruba su economia nacional. 

 

E impacto economico y di empleo cu e industria aki ta trece cune ta remarcabel. E pandemia tambe a trece tendencianan nobo unda cu bishitantenan ta opta pa tin acomodacion cu facilidadnan propio como tambe un acomodacion unda cu un grupo mas grandi di famia por keda hunto. Cu e tendencia aki, e no ta sorprendente cu e industria di Vacation Rental a recupera relativamente mas lihe cu turismo en general despues di e pandemia.

 E impacto di $248,6 miyon di dollar den ingreso directo for di Vacation Rentals ta traduci den $478.7 miyon di dollar den e total di actividadnan economico, cu ta representa un poco mas di 5600 cupo di trabou. 

Na aña 2022 probablemente e impacto economico di Vacation Rental na Aruba lo yega alrededor di 20% di nos turismo total. Mirando e tendencianan, esaki ta duna indicacion cu pa e proximo añanan e industria di Vacation Rental lo sigui crece, contribuyendo considerablemente na economia di Aruba. 

Presidente di VRPA, sr. Stuart de Vries a enfatisa cu e asociacion lo traha duro pa e industria di Vacation Rental por sigui desaroya na un manera profesional, como tambe promove regulacion y cumplimento. “Cu e cumbre y estudio di e impacto economico aki, VRPA a pone e prome paso pa sigui desaroya e industria na un manera profesional, diligente y sostenibel,” de Vries a bisa. Presidente di VRPA, den nomber di board, ta gradici Aruba Tourism Authority y AHATA pa nan aporte pa cu e estudio.

 

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.